Վրաստանը պատրաստ է կառուցողական երկխոսության Ռուսաստանի հետ, ասել է լրագրողներին ռուս-վրացական հարաբերությունների գծով Վրաստանի վարչապետի հատուկ ներկայացուցիչ Զուրաբ Աբաշիձեն՝ մեկնաբանելով Սերգեյ Լավրովի հայտարարությունը:
Աբաշիձեն ողջունել է ՌԴ ԱԳՆ ղեկավարի երեկվա հայտարարությունը, ըստ որի կողմերի հանդիպումը տեղի կունենա մոտ ապագայում:
«Հաստատում եմ, որ առաջիկայում տեղի կունենա իմ ոչ պաշտոնական հանդիպումը ՌԴ ներկայացուցչի հետ: Հանդիպման վայրը Եվրոպայում և ամսաթիվը ճշտվում են: Մենք նաև դրական ենք գնահատում ՌԴ ԱԳՆ ղեկավարի այն հայտարարությունը, որ Մոսկվան պատրաստ է վերականգնել առևտրա-տնտեսական կապերը Վրաստանի հետ»,-ասել է նա:
Վրաստանի ԱԳ նախարար Մայա Փանջիկիձեն ճեպազրույցում ասել է, որ ՌԴ ներկայացուցիչների հետ Աբաշիձեի հանդիպումը տեղի կունենա այս շաբաթ:
