«Այցը Հայաստանի Ազգային ժողով մեկ քայլ է` ապագայում կատարվելիք քայլերի ճանապարհին»,- հայտարարել է Թուրքիայի Ազգային մեծ ժողովի պատգամավոր Թուրհան Չյոմեզը Հայաստանի խորհրդարանի նախագահ Արթուր Բաղդասարյանի հետ հանդիպման ժամանակ, հաղորդում է ՀՀ ԱԺ մամլո ծառայությունը: Հանդիպման ընթացքում նա կարեւորեց, որ երկու կողմերն էլ համաձայն են եւ ցանկանում են այդ հարցերը քննարկել` ոչ միայն երկկողմանի հարաբերությունների, այլեւ տարածաշրջանային հարաբերությունների զարգացման համար: Չյոմեզի խոսքերով, Թուրքիան չի կարող ասել, որ գոյություն չունի այն, ինչ արդեն եղել է եւ պետք է առաջ գնալ` բաց աչքերով նայելով իրականությանը: Այնուհանդերձ` նա ցեղասպանության ճանաչման խնդիրը համարեց պատմաբանների խնդիրը: «Մենք այն երկրներն ենք, որ ապրում ենք աշխարհագրական նույն տարածքում եւ պետք է միմյանց հետ համաձայնության գանք»,- նշել է Չյոմեզը: Նա Թուրքիայի Ազգային մեծ ժողովի նախագահ Բյուլենտ Առինչի ողջույնները եւ բարեմաղթանքները փոխանցեց Աժ նախագահին եւ պատրաստակամություն հայտնեց թուրք հասարակության ու թուրք իշխանությունների մեջ տարածել հանդիպման ընթացքում քննարկված գաղափարները ու դրական զարգացումների պատրաստակամությունը: Կողմերը քննարկեցին նաեւ երկու խորհրդարանների հովանու ներքո Հայաստանի եւ Թուրքիայի երիտասարդների հանդիպում կազմակերպելու հնարավորությունը քննարկելու հայ-թուրքական հարաբերություններում առկա խնդիրները: