Լեռնային Ղարաբաղի հարցի լուծումը շատ կարևոր է ԵՄ-ի համար, քանի որ դա տարածաշրջանում կայունություն կապահովի: Այս մասին այսօր Երիտասարդ առաջնորդների դպրոցի և «Կոնրադ Ադենաուեր» հիմնադրամի նախաձեռնած դասախոսության ժամանակ ասաց Հայաստանում ԵՄ պատվիրակության ղեկավար, դեսպան Տրայան Հրիստեան:

«ԵՄ-ն այն եզակի կառույցներից է, որը որևէ գաղտնի մտադրություն չունի: Մենք նավթից կախվածություն չունենք: ԵՄ-ի քայլերն ուղղված են տարածաշրջանում ժողովրդավարության, խաղաղության և փոխվստահության ամրապնդմանը»,-ընդգծեց դեսպանը: Նա հավաստիացրեց, որ ԵՄ-ն կշարունակի աջակցել Մինսկի խմբին և խաղաղ ճանապարհով հակամարտության լուծմանը: Նա նշեց, որ ԵՄ-ն կշարունակի ինչպես ֆինանսական, այնպես էլ քաղաքական աջակցություն տրամադրել Հայաստանին: