Հայաստանի նախագահին կից Ազգային անվտանգության խորհրդի քարտուղար, պաշտպանության նախարար Սերժ Սարգսյանը, մեկնաբանելով լրագրողների խնդրանքով Ադրբեջանի նախագահ Իլհամ Ալիեւի այն հայտարարությունը, թե ինքը պատրաստ է «որոշակի երաշխիքներ եւ արտոնյալ պայմաններ» տալ, եթե «Լեռնային Ղարաբաղը վերադառնա Ադրբեջանի իրավասության տակ», հայտարարել է.«Լավ կլիներ, որ այդ խոսքերը հնչեին Ալիեւ-ավագի շուրթերից 20 տարի առաջ: Այն ժամանակ դրանք կարող էին ինչ-որ արժեք ունենալ, իսկ այսօր դրանք միայն խոսքեր են»: Նախարարը հերթական անգամ հիշեցրել է հայկական կողմի դիրքորոշումը, այն է` Լեռնային Ղարաբաղի հակամարտության լուծման երեք սկզբունքները (ԼՂՀ-ն չի կարող լինել Ադրբեջանի կազմում, Լեռնային Ղարաբաղը պետք է ցամաքային սահման ունենա Հայաստանի հետ, անհրաժեշտ է ԼՂՀ անվտանգության հստակ երաշխիքների ապահովում) եւ հայտարարել է, որ այս համատեքստում «ցանկացած որոշում շահավետ է մեզ համար, սակայն առավել հավանական է, եւ մեզ համար էլ շահավետ է ունենալ երկու պետություն»: Անդրադառնալով առանձին անձանց հավաստիացումներին, որոնք պնդում են, թե Հայաստանի պաշտպանության նախարարի հրապարակած փոխզիջումների քաղաքականությունը վկայում է պարտվողական տրամադրվածության մասին ղարաբաղյան հարցի լուծման ընթացքում եւ բացասաբար է անդրադառնում ԶՈՒ բարոյահոգեբանական վիճակի վրա, Սերժ Սարգսյանը հայտարարել է.«Ո՞վ է բանակի բարոյահոգեբանական վիճակի այդ մասնագետը, որը փորձում է մեղադրել ինձ եւ ով է ինձնից լավ հասկանում այդ հարցերը»: «Ես խորհուրդ կտայի այդ մարդկանց 10 անգամ մտածել, հետո խոսել, քանի որ դրանք այն մարդիկ են, որոնք ծանոթ չեն բանակին, փախել են բանակից: Եթե նրանք իրոք մտահոգված են բանակում տիրող իրավիճակով, մտածում են հողերի մասին, թող գնան եւ պաշտպանեն»,-նշել է Հայաստանի պաշտպանական գերատեսչության ղեկավարը: «Այո, ես խոսել եմ փոխզիջումների մասին: Ասել եմ 10 տարի առաջ եւ կասեմ այնքան ժամանակ, մինչեւ որ այդ հարցը կլուծվի: Եթե ինձ ցույց տան առանց փոխզիջումների կարգավորվող հարցեր, ես կասեմ, որ իրավացի չեմ եղել: Բայց ներկայացնել փոխզիջումների գնալու պատրաստակամությունը որպես պարտվողական տրամադրություն, դա արդեն քաղաքական խայթոց է: Բոլորը գիտեն, որ ես նման տրամադրություն չունեմ, ինչն էլ ապացուցել եմ ողջ կյանքիս ընթացքում»,-հայտարարել է Սերժ Սարգսյանը: «Բանակցային գործընթացի ներկայիս փուլը դեռեւս 1998 թվականին սկսված գործընթացների տրամաբանական շարունակությունն է: Կարծում եմ, որ եթե ամեն ինչ շարունակվի այդ տրամաբանությամբ, մենք բոլորս այն բանի վկաները կդառնանք, թե ում խոսքերն էին ճիշտ եւ ով էր կանգնած ճշմարիտ ուղու վրա»,-նշել է հայ նախարարը: Ընդ որում նա կարեւորել է Լեռնային Ղարաբաղի հարցով տարբեր զեկույցները միջազգային կառույցներում, «քանի որ մենք միջազգային հանրության մի մասն ենք կազմում»; «Սակայն չեմ կարծում, որ այսօր եկել է պահը, երբ մեզ համար կհրապարակվեն վճռորոշ զեկույցներ»,-հայտարարել է Հայաստանի պաշտպանության նախարարը, հաղորդում է «Ռեգնում» գործակալությունը: