ԱՄՆ նախագահի կայքում սիրիահայերի համար դեռ 500 ստորագրություն է հավաքվել

11 հունվարի 2013 - 15:56 AMT

PanARMENIAN.Net - ԱՄՆ նախագահ Բարաք Օբամայի կայքէջում հայ-թուրքական սահմանը սիրիահայերի համար առանց նախապայմանների բացմանն ուղղված ստորագրահավաքի կազմակերպիչներից Դանելի Իոնիսյանն այսօր ասուլիսի ժամանակ ասաց, որ այն նախաձեռնելիս ՀՀ պետական, դիվանագիտական կառույցների կարծիքը նախապես չեն հարցրել:

«Ես այնքան էլ մեծ կարծիք չունեմ ՀՀ դիվանագիտության մասին: Ստորագրահավաքը միանշանակ դրական նախաձեռնություն է և կարող է օգտագործվել հենց այդ կառույցների կողմից, քանի որ ամեն դեպքում` սահմանը կբացվի, թե՝ ոչ: Վերջին դեպքում կարող ենք եվրոպական երկրներին ցույց տալ, որ իրենց ռազմական ուժերն ուղարկում են պաշտպանելու մի երկրի, որը նույնիսկ հումանիտար նպատակներով մի սահմանակետ չի բացում», - ասաց Դանիել Իոնիսյանը:

Կազմակերպիչների նշած տվյալով՝ Սիրիայում այս պահին բնակվում է 200.000 հայ: Օդային ճանապարհով Հայաստան հասնելը թանկ է ու ինքնաթիռի տոմսերն էլ սահմանափակ են: Ցամաքային ճանապարհը 1800 կմ է, անցնելը 2-3 օր է տևում: Նիկողոս Բալաջյանը տասը օր առաջ է այդ ճանապարհն անցել` Սիրիայից Թուրքիա, Թուրքիայից Վրաստան, այնտեղից էլ Հայաստան:

«2.5 օր տևեց: Ձյուն կար, ճանապարհները սառած էին: Ամեն վայրկյանը բախումներից խուսափելու վախով էինք անցնում: Ինձ պես էլի սիրիահայեր են ուզում գալ, բայց ֆինանսական պայմանների ու փաստաթղթերի պատճառով չեն կարողանում: Չեն կարողանա նաև կազմակերպված ստորագրահավաքին մասնակցել, քանի որ էլեկրտաէներգիա ու ինտերնետ չկա», - ասաց նա:

Մարգարյանի սահամանակետով Հալեպից Երևան հասնելն ընդամենը 10 ժամ կտևի, իսկ որպեսզի Օբամայի վարչակազմը քննարկի հարցը 30 օրվա ընթացքում առաջարկը պիտի 25.000 ստորագրություն հավաքի: Երեկվա տվյալով դեռ 500 ստորագրություն է: Կազմակերպիչները նշում են, որ պատահել է նաև այնպես, որ ավելի քիչ ստորագրություն հավաքած առաջարկներն են ուշադրության արժանացել:

Հղումներ թեմայով.

http://http://petitions.whitehouse.gov/petition/call-government-turkey-open-its-border-armenia-refugees-syria/nbmX159C?utm_source=wh.gov&utm_medium=shorturl&utm_campaign=shorturl

http://petitions.whitehouse.gov/register?destination=petition/call-government-turkey-open-its-border-armenia-refugees-syria/nbmX159C