Գերմանիայի քրիստոնեադեմոկրատական միության առաջնորդ Անգելա Մերկելը եւ Ֆրանսիայի կառավարող Ժողովրդական շարժում միության նախագահ եւ ներքին գործերի նախարար Նիկոլա Սարկոզին Փարիզում կազմակերպված համատեղ մամուլի ասուլիսում հայտարարել են, որ դեմ են Թուրքիայի անդամակցությանը Եվրամիությանը, եւ որ դրա փոխարեն Անկարային պետք է արտոնյալ գործընկերություն առաջարկվի: Նշելով, որ Թուրքիայի հետ ԵՄ բանակցություններն սկսելուց առաջ պետք է նայել, թե որքանով է կատարել Թուրքիան Կիպրոսի խնդրի կարգավորման հետ կապված նախապայմանները, Մերկելն ասել է, որ Ֆրանսիայում եւ Հոլանդիայում ԵՄ սահմանադրությունը մերժվելու իրողությունը վկայում է այն մասին, որ ԵՄ-ն պետք է վերանայի իր ընդլայնման ծրագիրը եւ ճշտի Եվրոպայի սահմանները:
Նրա խոսքերո, Եվրոպայի կառուցման շարունակությունը զգալիորեն պայմանավորված է Գերմանիա-Ֆրանսիա հարաբերություններով, եւ որ անկախ նրանից, թե ովքեր կգան իշխանության Գերմանիայում` աշնանը տեղի ունենալիք վաղաժամկետ խորհրդարանական ընտրություններում, երկու եկրների միջեւ սերտ կապերը պետք է պահպանվեն: Ինչպես նշում է թուրքական «Ռադիկալը», Ավստրիայի ԱԳՆ ղեկավար Ուրսուլա Պլեսնիկը հայտարարել է, որ լիիրավ անդամակցության փոխարեն Թուրքիային այլընտրանք պետք է առաջարկվի: Նրա խոսքերով, այդ պահանջը պետք է ամրագրվի Թուրքիայի ԵՄ անդամակցության մասին պատրաստվող շրջանակային փաստաթղում: