Հուլիսի 16-ին եւ 26-ին Կանադայի հեռուստատեսության հանրաճանաչ ալիքներն անդրադարձել են Հայոց ցեղասպանության եւ Լեռնային Ղարաբաղի թեմաներին, տեղեկացնում է Հայոց ցեղասպանության 90-րդ տարելիցին նվիրված միջոցառումների կազմակերպման պետական հանձնաժողովը: Կանադայի ամբողջ տարածքով հեռարձակվող Global հեռուստաընկերության Prime ալիքը «Անցած կյանքեր» հաղորդաշարի ընթացքում առաջին անգամ թողարկել է ռեժիսոր Ռոհըն Ֆերնանդոյի Հայոց ցեղասպանությանը նվիրված 30-րոպեանոց հաղորդումը, իսկ CBC Newsworld հեռուստաալիքի «Արձակուրդներ վտանգավոր գոտում. Վայրեր, որոնք գոյություն չունեն» հաղորդաշարը ցուցադրել է Լեռնային Ղարաբաղին նվիրված վավերագրական կինոնկարը: «Անցած կյանքեր» վավերագրական կինոնկարում ցուցադրվել է ֆիլմի հեղինակներից մեկի` Գարի Տիգրանյանի հայոց ցեղապանությանը ականատես եղած պապի տեսագրությունները: Global հեռուստաընկերությունը մտադիր է կինոնկարը կրկին ցուցադրել հաջորդ տարվա սկզբին: Լեռնային Ղարաբաղին նվիրված վավերագրական կինոնկարի հեղինակ, լրագրող Սայմն Ռիվը ճանաչողական նկարահանումներ է կատարել ղարաբաղյան պատերազմի ժամանակ` վերլուծելով հակամարտության մանրամասները, մասնավորապես շեշտելով Շուշիի ճակատամարտի ռազմավարական նշանակությունը հայերի համար: Լրագրողն այցելել է հայ ընտանիքներ, կատարելով հետաքրքիր ուսումնասիրություններ, անմիջական հարցազրույցներ է ունեցել տարբեր խավերի ներկայացուցիչների հետ: Սայմն Ռիվը այցելել է նաեւ հակամարտությունների այլ գոտիներ, միջազգային հանրության կողմից չճանաչված երկրներ` Սոմալի, Աբխազիա, Մերձդնեստրիա, Հարավային Օսիա, Տայվան եւ վավերագրական ֆիլմեր նկարահանել այդ երկրների մասին: