Երեկ երեկոյան 18։00-ից մինչև կեսգիշեր Ադրբեջանի զինուժը անընդմեջ տարբեր զինատեսակներից գնդակոծել է Տավուշի մարզի սամանամերձ Այգեպար, Մովսես և Ներքին Կարմրաղբյուր գյուղերը։

PanARMENIAN.Net-ի թղթակցի զանգի պահին Այգեպարի գյուղապետ Անդրանիկ Այդինյանն ու Ներքին Կարմրաղբյուրի գյուղապետ Մանվել Կամենդատյանը միասին էին: Վերջինի խոսքով սահմանամերձ գյուղերի գյուղապետերը միշտ էլ միասին են` մեկը մյուսի խնդիրն ամենից լավ են հասկանում: Կրակոցների մասին նշեցին, որ դրանք դադարել են, բայց գիշերը թշնամին գնդակոծել է գյուղերն ու վստահ չեն, որ այս գիշեր նույնը չի կրկնվի:

«Խոշոր տրամաչափի զենքերից են կրակում:Տանիքներ, լուսամուտներ են վնասվել: Գյուղացիներից մեկի տանը պայթյուն է եղել», - պատմեց Ներքին Կարմրաղբյուրի գյուղապետը:

Մովսեսի գյուղապետ Արարատ Ավալյանն էլ PanARMENIAN.Net-ի թղթակցին հայտնեց, որ իրենց մոտ վնասվել են տների տանիքներ, պատուհաններ. «Գյուղի վրա «Շիլկայով», «ԴեՇեԿա»-յով, «ԿաՊեՎեՏե»-ով են կրակում»:

Մովսեսի գյուղապետն նշեց նաև, որ այս պահին իրավիճակը խաղաղ է, գյուղացիներն էլ հավաքվել համագյուղացիներից մեկի 50-ամյակ են տոնում: «Մի բաժակ բան խմենք, որ գիշերը նորից սկսելու են», - ասաց գյուղապետը: