«Ժառանգություն» կուսակցությունը նոր կառավարության մաս կազմելու հարց չի քննարկել: Այս մասին լրագրողների հետ ճեպազրույցում ասաց «Ժառանգություն» խմբակցության ղեկավար Ռուբեն Հակոբյանը:Անդրադառնալով այսօր ԱԺ նախագահի մոտ տեղի ունեցած խորհրդակցությանը, նա նշեց, որ քանի դեռ բանակցությունները շարունակվում են վերջնական ասելիք չունեն: «Մենք, բնականաբար, ուզում ենք, որ բանակցությունները նորմալ արդյունք ունենան, և բանակցությունների ընթացքում բացահայտումներ անելը չի նպաստում բանակցությունների նորմալ ընթացքին և ավարտին: Բնականաբար, եթե համաձայնություն լիներ, կասինք, որ համաձայնություն կա, բայց քանի որ նման բան չենք ասում, նշանակում է, որ կան վիճելի կետեր»,- ասաց Ռուբեն Հակոբյանը` չմանրամասնելով, թե որոնք են այդ վիճելի կետերը:
Հարցին, թե իշխանությունը հակվա՞ծ է արտահերթ խորհրդարանական ընտրություններ անցկացնելուն, Ռուբեն Հակոբյանը հայտարարեց, որ իշխանությունն այս պահին քննարկում է այդ հարցը:
Ինչ վերաբերում է երեկ լրագրողների հետ հանդիպմանը Հովիկ Աբրահամյան հայտարարությանը, թե ՀՀ նախագահի հետ հանդիպման ժամանակ Րաֆֆի Հովհաննիսյանի առաջարկները ողջամիտ չէին. որ «Ժառանգությունը» տարբեր առաջարկներ կարող է ներկայացնել` ընդհուպ մինչև կառավարությունում տեղեր զբաղեցնելը, ինչը ողջամիտ առաջարկություն է, Ռուբեն Հակոբյանը նշում է, որ իրենք էլ դիտում են, որ այդ առաջարկությունը ողջամիտ չէ:
