«Հայազն» կուսակցությունը հայտարարություն է տարածել, որում դատապարտում է ուսանողական ցույցերի և դասադուլի մասնակիցների նկատմամբ բռնության որևէ կիրառություն:
«Դատապարտելի է այդ բռնություններին բուհական ուսանողական խորհուրդների, ինչպես նաև «ուսումնատենչ» ուսանողների կազմակերպված հրոսակախմբերի ներգրավումը, և հատկապես այդ նպատակով հայրենակցական կապերի շահագործումը:
Համոզված ենք, որ նման գործողությունները հրահանգվում են իշխանական բարձր աշխատասենյակներից և կախյալ կատարողներին են փոխանցվում անմիջապես համալսարանների ղեկավարների միջոցով: Այս խայտառակությունը պետք է բացառվի»,-ասված է հայտարարության մեջ:
«Հայազն» կուսակցությունը հայտարարում է, որ ապագայում բոլոր միջոցներով պաշտպանելու է պայքարող ուսանողներին ցանկացած նման ոտնձգությունից:
«Միաժամանակ, մենք առավելագույնս կազմակերպվելու, ընդհանուր նպատակները հստակեցնելու և հետագա գործողությունները արդյունավետ ծրագրելու կոչ ենք ուղղում բողոքի ցույցերին մասնակցող և քաղաքականապես ակտիվ մյուս ուսանողներին:
Դեպի ազգային պետություն տանող մեր պայքարը տևական է լինելու, բայց անպայման հաղթական»,- ասված է «Հայազնի» տարածած հայտարարության մեջ: