Ճարտարապետների միության նախագահ Մկրտիչ Մինասյանը համոզված է, որ ԱԳՆ շենքը հյուրանոցի վերածվելուց հետո կկորցնի իր նշանակությունը և կդառնա ընդամենը գեղեցիկ շենք:
«Եթե իմանայինք, որ վաճառքից հետո այն կվերանորոգվի, կլինի լավ պահպանված շենք, խնդիր չէր լինի: Բայց վերջին տարիներին այնքան շինություններ ենք կորցրել, որ այլևս վստահություն չկա»,- այսօր լրագրողների հետ հանդիպման ժամանակ ասաց նա:
Ասուլիսի մյուս բանախոսը՝ ճարտարապետ Սաշուր Քալաշյանը, ով Ծիծեռնակաբերդի հուշահամալիրի նախագծողներից է, նշեց, որ անգամ արտաքինից ԱԳՆ շենքը չի համապատասխանում հյուրանոցի պահանջներին:
«ԱԳՆ շենքը կառավարական շենքի կերպար է: Այն հյուրանոց դարձնելը նույնն է, թե դարձնես շուկա»,- ասաց նա և հավելեց, որ եթե այս կերպ են վարվում կարևոր հուշարձանների հետ, այլևս ասելու բան չի մնում. «Եկեք բոլորը քանդենք»,- հավելեց ճարտարապետը:
Մկրտիչ Մինասյանն ասաց, որ երկու տարի առաջ , երբ իմացել են աճուրդի մասին, կառավարությունից իրենց ասել են, որ նման բան չկա և շենքը աճուրդի չի դրվի, բայց, փաստորեն, բոլորովին այլ բան տեղի ունեցավ:
Հիշեցնենք, որ Ճարտարապետների միության նախագահը բաց նամակով դիմել է ՀՀ նախագահին, սակայն դեռևս պատասխան չի ստացել: Նամակի պատճեները նաև դատախազություն ու վարչապետին են ուղարկվել:
