Վրաստանում վերացնում են փոթորկի հետևանքները, որը նախօրեին տանիքներ է պոկել, ենթակառուցվածքներ ու էլեկտրահաղորդակցության գծեր վնասել: Ստեղծվել է հետևանքների վերացման արտակարգ շտաբ, որը գլխավորում է փոխվարչապետ, էներգետիկայի նախարար Կախի Կալաձեն: Ամենից շատ տուժել են Աջարիայի բնակավայրերը, Գորի քաղաքը, նաև Թբիլիսիի առանձին թաղամասեր: Վնասի չափը դեռ հայտնի չէ:

Այսօր Գորի է այցելել երկրի վարչապետ Բիձինա Իվանիշվիլին: Գորիում ուժգին փոթորիկը 80 բնակելի տների տանիքներն է պոկել, 40 հազար բաժանորդ մնացել է առանց էլեկտրաէներգիայի: Վարչապետը հայտարարել է, որ վերականգնողական աշխատանքներն արդեն սկսվել են: «Մենք ժամանակ չենք կորցնի, ամեն ինչ որակով կարվի»,-ասել է նա:

Վրաստանում շուրջ 100 հազար բաժանորդներ զրկված են էլեկտրաէներգիայից, հայտնում է ՌԲԿ-ն: