Շարունակվում են Ազգային անվտանգության խորհրդի քարտուղար Արթուր Բաղդասարյանի հանդիպումները Լեհաստանի Հանրապետությունում: Մարտի 27-ին Արթուր Բաղդասարյանին ընդունեց Լեհաստանի նախագահ Բրոնիսլավ Կոմորովսկին: ԱԱԽ քարտուղարը նախ փոխանցեց նրան ուղղված ՀՀ նախագահ Սերժ Սարգսյանի ուղերձը: Հանդիպման ընթացքում ընդգծվեց հայ-լեհական քաղաքական երկխոսության բարձր մակարդակը և կարևորվեցին դրա ամրապնդմանն ուղղված հետագա քայլերը: Լեհաստանի նախագահին ներկայացվեց երկու երկրների անվտանգության խորհուրդների կողմից համատեղ իրականացված, ՀՀ և ԼՀ միջև կնքված միջազգային պայմանագրերի կատարման ընթացքի դիտարկման արդյունքները:
ԱԱԽ քարտուղարը նշեց, որ իր գործընկերոջ հետ պայմանավորվել են ընդլայնել համագործակցության ոլորտներն ու շրջանակները: Բրոնիսլավ Կոմորովսկին բարձր գնահատեց կատարված աշխատանքները և ողջունեց համագործակցությունը խորացնելու կողմերի պատրաստակամությունը: Հանդիպման ընթացքում քննարկվեցին նաև ՀՀ նախագահ Սերժ Սարգսյանի` առաջիկայում Լեհաստան կատարվելիք այցին առնչվող հարցեր: Նույն օրը Լեհաստանի արտաքին գործերի նախարարությունում տեղի ունեցավ ԱԱԽ քարտուղարի հանդիպումը Լեհաստանի արտաքին գործերի պետական քարտուղար Բոգուսլավ Վինիդի հետ: Քննարկվեց հայ-լեհական հարաբերությունների զարգացմանը վերաբերող հարցերի լայն շրջանակ: Առանձնակի ուշադրություն դարձվեց Հայաստանի եվրաինտեգրման և Արևելյան գործընկերության խորացման ճանապարհին լեհական կողմի հնարավոր օժանդակության, դրանց շրջանակներում համատեղ ծրագրերի իրականացման հնարավորություններին և հեռանկարներին:
Ինչպես հայտնում են ԱԱԽ մամուլի ծառայությունից, Ա. Բաղդասարյանը հանդիպում է ունեցել նաև Եվրամիության արտաքին սահմանների օպերատիվ կառավարման գործակալության (FRONTEX) գործադիր տնօրեն Իլլկա Լայթինենի հետ, որի ընթացում քննարկվել են 2013-2014 թթ. սահմանային անվտանգության ոլորտում համագործակցության համատեղ ծրագրերը, կողմերի համար հետաքրքրություն ներկայացնող կոնկրետ միջոցառումները և դրանց իրականցման ժամկետները:
Այնուհետև Արթուր Բաղդասարյանը հանդիպել է Հայաստան-Լեհաստան բարեկամության պատգամավորական խմբի անդամների հետ` խմբի ղեկավար, ծագումով հայ Լուկաշ Աբգարովիչի հետ: Երկուստեք նշվեց, որ Հայաստանի և Լեհաստանի խորհրդարանների միջև հարաբերությունները հաջողությամբ զարգանում են:
Հանդիպման ժամանակ ընդգծվեց, որ երկու երկրների խորհրդարաններում ձևավորված պատգամավորական բարեկամության խմբերը կարևոր դերակատարություն ունեն օրենսդիր մարմինների կապերի ընդլայնման և խորացման գործում:
Հանդիպումներ տեղի ունեցան նաև Լեհաստանի Գիտությունների Ազգային ակադեմիայի Երկրի ընդերքի ֆիզիկայի և սեյսմոլոգիայի ինստիտուտում, Լեհ-հայկական առևտրաարդյունաբերական պալատում, Լեհաստանի տեղեկատվության և արտաքին ներդրումների գործակալությունում: Հանդիպումների ընթացքում քննարկվեցին հայ-լեհական համագործակցության խորացմանն առնչվող հարցեր:
