Այսօր ՀՀ ազգային հերոս, Արցախի հերոս Յուրա Պողոսյանի ծննդյան օրն է:
Յուրա Պողոսյանը ծնվել է 1961 թվականին: Մանկությունն ու պատանեկությունն անցել են Ստեփանակերտում: Խորհրդային բանակում ծառայելուց հետո Ստեփանակերտում` հայրական տանը կից բացել է սեփական արհեստանոցը, որն էլ հետագայում դարձել է ազգային-ազատագրական պայքարի առաջին զինանոցներից մեկը: Նրա պատրաստած զենքերն առաջին անգամ օգտագործվել են 1990 թ. Հադրութի շրջանում, երբ ադրբեջանցիները բռնի տեղահանում էին հայերին։
Արցախյան ազատամարտի ժամանակ նրա հավաքած խումբը դարձել է ապագա 4-րդ վաշտի կորիզը, որի հրամանատարը պետք է դառնար ինքը: Մարտական ընկերները տարբեր առիթներով պատմել են, որ չափազանց գաղտնապահ էր: Իր վաշտում անդամագրվել ցանկացողին առաջին հերթին հարցնում էր` գաղտնիք պահել գիտե՞ս…
Յուրա Պողոսյանը զոհվել է 1992 թ-ին հունիսի 12-ին, Ասկերանի շրջանի Նախիջևանի ճակատային գծում: Նրա աճյունն ամփոփված է Ստեփանակերտի գերեզմանատանը: