Ֆրանսիայում գործող «Հայաստան» մշակութային միությունը շարունակում է ստորագրահավաքը Ֆրանսիայի նախագահ Ֆրանսուա Օլանդին ուղղված նամակի տակ՝ հորդորելով կատարել նախընտրական խոստումն ու ընդունել Հայոց ցեղասպանության ժխտումը քրեականացնող օրինագիծը: Ստորագրահավաքն անցնում է «Ընդունել Հայոց ցեղասպանության ժխտումը քրեականացնող օրինագիծը հիմա» կարգախոսով:
Միայն Վալանսում, փաստաթղթի տակ արդեն հարյուրավոր մարդիկ են ստորագրել, ստորագրահավաքը շարունակվում է Փարիզում, Լիոնում, Մարսելում:
Նամակում ասվում է, որ օրինագծի ընդունումը Օլանդի նախընտրական խոստումներից մեկն է:
«Սակայն, այսօր, կես տարի անց, 600-հազարանոց հայ համայնքն ու նրա բարեկամները սպասում են ձեր առաջարկին, իսկ հայ համայնքը մտահոգված է ԱԳ նախարար Լորան Ֆաբիուսի հայտարարությամբ ֆրանս-թուրքական հարաբերությունների մասին»,-ասվում է նամակում, գրում է Nouvelles d'Armenie-ին:
Ակցիային իրենց աջակցությունն են հայտնել նաև ֆրանսահայ այլ կազմակերպություններ: «Հայաստան» միությունը մտադիր է նամակ հղել Ելիսեյան պալատ ապրիլի 24-ին: