Անցյալ շաբաթ ՄԱԿ-ի հասարակայնության հետ կապերի դեպարտամենտը կազմակերպել էր «1000 օր` Հազարամյակի զարգացման նպատակներին հասնելու համար» խորագրով միջոցառում, որի ժամանակ ելույթով հանդես եկավ ՄԱԿ-ի գլխավոր քարտուղարը՝ հիշեցնելով, որ անհրաժեշտ է ազգային մակարդակներում զարգացման նշված նպատակների գործընթացներն արագացնել համաշխարհային աղքատությունը իսպառ վերացնելու համար, հայտնում է ԱԳՆ մամլո ծառայությունը: Միջոցառմանը մասնակցեցին համաշխարհային լրատվամիջոցների, ՀԿ-ների, ՄԱԿ-ի անդամ պետությունների ներկայացուցիչներ, այդ թվում՝ ՄԱԿ-ում ՀՀ մշտական ներկայացուցիչ, դեսպան Կարեն Նազարյանը: Այս նախաձեռնությանն աջակցության ուղերձներ են հղել հետևյալ երկրները` Կիպրոսը, Բուլղարիան, Շվեդիան, Ֆրանսիան, Կորեայի Հանրապետությունը, Մոնակոն և Հայաստանը: Վերջինս իր ուղերձում նշել է, որ ՀՀ ողջունում է ՄԱԿ-ի ԳՔ այս նախաձեռնությունը և ընդգծում կայուն տնտեսական աճի ապահովման անհրաժեշտությունը` մրցացկության, նորամուծության և համահավասար հնարավորություններ ստեղծելու միջոցով: 2000թ. սեպտեմբերին Նյու Յորքում ՄԱԿ-ի անդամ պետությունները բարձր մակարդակով Հազարամյակի հռչակագրի ընդունման միջոցով ստանձնել են պարտավորություն մինչև 2015 թվականը հասնել Հազարամյակի զարգացման ութ նպատակների կատարմանը: Դրանք են՝ ծայրահեղ աղքատության և սովի հաղթահարում, համընդհանուր տարրական կրթության ապահովում, գենդերային հավասարության հաստատում, մանկական մահացության նվազեցում, մայրերի առողջության բարելավում, ՄԻԱՎ/ՁԻԱՀ-ի, մալարիայի և այլ հիվանդությունների դեմ պայքար, կայուն զարգացման ապահովում, զարգացման համար գլոբալ գործընկերության ծավալում: