ՀՀ փոխվարչապետի, տարածքային կառավարման նախարարի պաշտոնակատար Արմեն Գևորգյանի ղեկավարությամբ ապրիլի 20-ին Տարածքային կառավարման նախարարությունում տեղի ունեցած խոհրդակցությանը քննարկվեցին ոռոգման շրջանի մեկնարկին, համակարգի նախապատրաստվածությանը վերաբերող հարցեր: Խորհրդակցությանը մասնակցում էին ՏԿՆ Ջրային տնտեսության պետական կոմիտեի, Ջրառ և Ջրօգտագործող ընկերությունների (ՋՕԸ) ղեկավարներ:
ՋՕԸ-երի ղեկավարները տեղեկություններ ներկայացրեցին կատարված նախապատրաստական աշխատանքների մասին, քննարկվեցին, մասնավորապես, պոմպակայանների վերանորոգման և տեխնիկական շահագործման, ջրամբարներում կուտակված ջրային պաշարների հետ կապված հարցեր:
Զեկուցվեց, որ ոռոգման շրջանն արդեն մեկնարկել է Արարատյան դաշտավայրում, ոռոգման նախապատրաստական աշխատանքները գրեթե ավարտված են հանրապետության նախալեռնային շրջաններում, իսկ լեռնային շրջաններում համակարգը ոռոգմանը պատրաստ կլինի առաջիկա օրերին:
Ինչպես հայտնում են ՏԿՆ հասարակայնության հետ կապերի և լրատվության վարչությունից, Ա. Գևորգյանը կարևորեց ոռոգման նախապատրաստական աշխատանքների ճիշտ կազմակերպումը` գյուղացիական տնտեսություններին ժամանակին և պահանջարկին համապատասխան ջրամատակարարում ապահովելու համար: Նա առանձնահատուկ անդրադարձավ նաև համակարգի անխափան գործունեության ապահովման խնդրին` կարևորելով մատակարարված ջրի հաշվառման, ձևավորված հասույթների դիմաց վարձավճարների ժամանակին և ամբողջական հավաքագրման աշխատանքների իրականացումը:
Ա. Գևորգյանը նշեց, որ մի քանի օր առաջ անձամբ է ծանոթացել ջրամբարների ընդհանուր վիճակին, ջրակուտակման ծավալներին, պատասխանատուների հետ քննարկել հետագա կուտակման հնարավորությունները: Նա նշեց, որ ներկայումս կուտակված ծավալները դեռևս բավարար չեն պնդելու, որ լարվածություններ չեն առաջանա, ուստի ոռոգման շրջանի հենց սկզբից պետք է առավելագույնս խնայողաբար ջրամատակարարում իրականացնել:
Փոխվարչապետի պաշտոնակատարը նաև առանձնահատուկ ընդգծեց ՋՕԸ-ի կառավարման խորհուրդների աշխատանքների արդյունավետության բարձրացման անհրաժեշտությունը` նշելով, որ այնտեղ պետք է քննարկման առարկա դառնան կարևոր հարցերը, իսկ նրանց գործունեությունը պետք է թափանցիկ լինի հանրության համար: Նա նաև ընդգծեց ՋՕԸ-ջրօգտագործող հարաբերություններում կանխիկ վճարումների երևույթը բացառելու, ինչպես նաև բոլոր գանձումները բացառապես ջրօգտագործողների հետ կնքված պայմանագրերի համապատասխան իրականացնելու անհրաժեշտությունը:
Ոռոգման աշխատանքների արդյունավետ կազմակերպման համար Ա. Գևորգյանն առաջնային համարեց նաև համակարգի ֆինանսական կայունության ապահովման հարցը` ՋՕԸ-երի ղեկավարներին հորդորելով բացառել ծախսերի ավելացումը և աշխատանքներն իրականացնել հաստատված բյուջեների սահմաններում:
