Վարդան Ղուկասյանը և նրա որդին Գյումրիում հնչած կրակոցների գործով հրավիրվել են ոստիկանություն

PanARMENIAN.Net - Գյումրու նախկին քաղաքապետ Վարդան Ղուկասյանը և նրա որդին ոստիկանության Գյումրու բաժնում են: PanARMENIAN.Net ի թղթակցի հետ զրույցում ոստիկանության Գյումրու բաժնից հայտնեցին, որ այսօր կեսօրին Գյումրիում հնչած կրակոցների գործով շատ մարդիկ են հրավիրվել ոստիկանություն, նախաքննություն է ընթանում:

Ինչպես հայտնել էինք` այսօր Գյումրու բժշկական կենտրոնից ոստիկանության Գյումրու բաժնում ահազանգ էր ստացվել, որ Գյումրի քաղաքի Շիրակացի 54բ շենքի մոտից հրազենային վնասվածքներով իրենց մոտ են տեղափոխվել Հարություն Խաչատրյանը և Արտյոմ Կարապետյանը: Վերջինս հիվանդանոցում մահացել էր:

Դեպքի վայրի զննության ընթացքում հայտնաբերվել են արնանման հետքեր, ինքնաձիգի 4 պարկուճ, «Մակարով» ատրճանակի 3 պարկուճ և 1 կրակված գնդակ: Հրազենային վնասվածքով հիվանդանոց տեղափոխված Հարություն Խաչատրյանի բաճկոնի գրպանից հայտնաբերվել և առգրավվել է «Մակարով» ատրճանակի 1 փամփշտակալ՝ 7 փամփուշտներով:

Հանցագործությունը կատարելու կասկածանքով բերման ենթարկված Կոլյա Ղուկասյանը ձերբակալված է: Նա Վարդան Ղուկասյանի եղբոր որդին է: Դեպքի հնարավոր ականատեսներ հայտնաբերելու նպատակով հարցաքննվել են վկաներ:

Ձեռնարկվում են անհրաժեշտ օպերատիվ-հետախուզական և քննչական միջոցառումներ սպանության դեպքի բոլոր հանգամանքները պարզելու նպատակով: Նախաքննությունը շարունակվում է: