Այսօր աշխարհի ավելի քան 100 պետություններում նշվում է աշխատավորների միջազգային օրը: Իսկ ամեն ինչ սկսվեց 1884 թ., երբ ԱՄՆ-ում և Կանադայում կազմակերպվեցին 1-ին ցույցերը` ութժամյա աշխատանքային օրվա պահանջով: Երկու տարի անց խոշոր ցույցեր կազմակերպվեցին ԱՄՆ-ի խոշոր արդյունաբերական քաղաք Չիկագոյում` ոստիկանության հետ բախումներ, ձերբակալվածներ, իսկ կազմակերպիչները նույնիսկ դատապարտվեցին մահվան: Տարեցտարի ցույցերն ավելի մարդաշատ էին դառնում և 1889թ.-ին Երկրորդ Ինտերնացիոնալի Փարիզի Կոնգրեսը որոշում ընդունեց ամեն մայիսի մեկին երթեր և հանրահավաքներ անցկացնել:

1890 թվականին Ավստրո-Հունգարիայի, Բելգիայի, Գերմանիայի, Դանիայի, Իսպանիայի և այլ եվրոպական երկրների աշխատավորներն 1-ին անգամ կազմակերպեցին մայիսմեկյան տոնակատարություններ: 20-րդ դարի սկզբին հեղափոխական շարժումը տեղափոխվեց Ռուսաստան` 1891թ. Պետերբուրգում տեղի է ունեցել առաջին մայիսմեկյան ցույցը:

Խորհրդային Միության տարիներին մայիսի 1-ը նշվում էր որպես մեծ տոն` ուղեկցվելով մեծ շքերթով: Սովետական Հայաստանում տոնը մասնավորապես սկսեցին նշել 1919թ.-ին: