Իշխող Հանրապետական կուսակցությունը Գործադիր մարմնի նիստ է գումարել, որին կհաջորդի Խորհրդի նիստ: Վերջինի ժամանակ վերանշանակված վարչապետ Տիգրան Սարգսյանը կներկայացնի նոր կառավարության կազմը: Կուսակցության գրասենյակում են ՀՀ նախագահ, ՀՀԿ առաջնորդ Սերժ Սարգսյանը, վարչապետ Տիգրան Սարգսյանը, ԱԺ նախագահ Հովիկ Աբրահամյանը և ՀՀԿ ԳՄ ու Խորհրդի անդամներ:
Շրջանառվող լուրերի համաձայն` կառավարության կազմում էական փոփոխություններ չեն լինի: Ըստ այդ տեղեկությունների` ՀՀ էկոնոմիկայի նախարար Տիգրան Դավթյանը, սփյուռքի նախարար Հրանուշ Հակոբյանն ու բնապահպանության նախարար Արամ Հարությունյանը չեն շարունակի պաշտոնավարել, իր պաշտոնին չի մնա նաև ՀՀ ֆինանսների նախարարի պաշտոնակատար Վաչե Գաբրիելյանը: Ֆինանսների նոր նախարար հնարավոր է նշանակվի Կառավարության աշխատակազմի ղեկավար Դավիթ Սարգսյանը, շրջանառվում է նաև ՊԵԿ նախագահ Գագիկ Խաչատրյանի անունը:
Մեկ այլ վարկածի համաձայն` սպորտի և երիտասարդության հարցերով նախարարությունը կբաժանվի երկու մասի: Սպորտի նախարար կնշանակվի նախագահի խորհրդական Յուրի Վարդանյանը, ով այս պահին ՀՀԿ գրասենյակում է, իսկ Երիտասարդության հարցերով նախարար՝ «Հայոց Արծիվներ» ՀԿ նախագահ Խաչիկ Ասրյանը:
Ավելացնենք, որ ավելի վաղ PanARMENIAN.Net ի թղթակցի հետ զրույցում Յուրի Վարդանյանի օգնական Անի Հայրապետյանը հայտնել էր, որ Վարդանյանին առաջարկել նախարարի պաշտոնը, և վերջինս էլ համաձայնել է:
