Մարդու իրավունքների պաշտպանի Գեղարքունիքի տարածքային գրասենյակի նախաձեռնությամբ օրերս կազմակերպվել էր դասընթաց ուսուցանողների համար, որին մասնակցում էին Գավառի դպրոցների բարձր դասարանների աշակերտները: Վերջիններիս ցանկությամբ քննարկաման համար ընտրվել էին հետևյալ երկու թեմաները՝ «Կանանց և երեխաների բռնությունը ընտանիքում» և «Ծնողները որպես «պատասխանատուներ» երեխաների կողմից կատարված հանցագործությունների համար»:
Հանդիպման ընթացքում Պաշտպանի Գեղարքունիքի տարածքային գրասենյակի աշխատակիցները մասնակիցներին ներկայացրեցին զոհ դարձած կանանց և երեխաների իրավունքները, թե ընտանեկան բռնությունից պաշտպանվելու ինչ հնարավորություններ ունեն նրանք և ում կարող են դիմել նման դեպքերում համապատասխան խորհրդատվություն և օգնություն ստանալու նպատակով: Նրանք տեղեկացան նաև, թե ոստիկանության, դատախազության և այլ պետական մարմինների ներկայացուցիչներն ինչ պարտականություններ ունեն այս հարցում, քանի որ քիչ չեն դեպքերը, երբ, օրինակ, ոստիկանության առանձին աշխատակիցներ անտեսում են իրենց դիմած բռնության զոհին և համապատասխան մոտեցում չեն ցուցաբերում նրան: Կարծիքներ փոխանակվեցին նաև այն մասին, թե որքանով են ծնողները պատասխանատու իրենց երեխաների կատարած հանցանքների կամ զանցանքների համար:
Ներկաները ծանոթացան, թե ինչ դեր ունի Մարդու իրավունքների պաշտպանը ընտանեկան բռնության կանխարգելման և զոհերի իրավունքների պաշտպանության հարցում, և որ դեպքերում կարելի է դիմել նրան: Դասընթացի ավարտին երեխաներին բաժանվեցին տեղեկատվական գրքույկներ և բուկլետներ, որտեղ մանրամասն նկարագրվում են ընտանեկան բռնության կամ այլ իրավունքների ոտնահարման դեպքում Պաշտպանին դիմելու կարգն ու միջոցները: Նշվեց նաև Պաշտպանի 116 թեժ գծի մասին, որին հնարավոր է ահազանգել յուրաքանչյուր խախտման դեպքում:
Ստացված գիտելիքները աշակերտները այնուհետև պետք է փոխանցեն իրենց կրտսեր ընկերներին, ծանոթացնեն նրանց իրենց բոլոր իրավունքներին և պարտականություններին: Այդ նպատակով ծրագրի երկրորդ փուլով Պաշտպանի Գեղարքունիքի տարածքային գրասենյակի նախաձեռնությամբ տեղի դպրոցներում կստեղծվեն բանավեճի ակումբներ, հայտնում են ՄԻՊ գրասենյակից:
