Մայիսի 28-ին Հայաստանը տոնում է Հայաստանի Առաջին հանրապետության օրը, մայիսյան այս օրերին նշում ենք նաև Սարդարապատի ճակատամարտի տարեդարձը:
Ինչպես հայտնեց փոխվարչապետ Արմեն Գևորգյանը, այս տարի տոնական միջոցառումները ավելի մեծ թափով կնշվեն: Սարդարապատի հուշահամալիրում հիմնական միջոցառումներից բացի տոնական միջոցառումներ կանցնեն նաև Երևանում և Բաշ-Ապարանում: «Բավականին հետաքրքիր է լինելու, առաջարկում եմ բոլորին ակտիվ մասնակցություն ունենալ»,-ասաց փոխվարչապետը մայիսի 23-ին կառավարության նիստից հետո հայտարարությունների ժամին:
Սարդարապատի ճակատամարտը տեղի է ունեցել 1918թ մայիսի 12-28-ին` հայ կանոնավոր զորքերի և Արևելյան Հայաստան ներխուժած թուրք զավթիչների միջև, Սարդարապատում: Ճակատամարտն ավարտվել է հայերի փայլուն հաղթանակով: Սարդարապատի ճակատամարտը, որը տեղի էր ունենում Ղարաքիլիսայի և Բաշ-Ապարանի ազատամարտերի հետ միասին հայ ժողովրդի ազատագրական պակքարի ամենափայլուն էջերից է: Այն ապացուցեց, որ հաջողության գրավականը ազգի միասնության մեջ է:
Ամեն տարի մայիսի 28-ին Հայաստանը տոնում է Հայաստանի Առաջին հանրապետության օրը: 1918թ. մայիսի 28-ին Անդրկովկասի Ժողովրդավարական Դաշնային Հանրապետության (ԱԺԴՀ) փլուզումից հետո Արևելյան Հայաստանի տարածքում հռչակվեց անկախ Հայաստանի Հանրապետությունը:
Առաջին Հանրապետությունը գոյատևեց երկու տարի: 1920-ի դեկտեմբերի 2-ին ՀՀ կառավարությունը վերջին վարչապետ Սիմոն Վրացյանի գլխավորությամբ պայմանագիր ստորագրեց բոլշևիկների հետ: Ստեղծվեց Հայկական ԽՍՀ-ն, որը գոյատևեց մինչև ԽՍՀՄ փլուզումը` 1991թ: