Հայաստանի նախագահ Ռոբերտ Քոչարյանն այսօր հերթական հանդիպումն է ունեցել Հայաստանում հավատարմագրված Եվրամիության անդամ երկրների դիվանագիտական ներկայացուցչությունների ղեկավարների, Եվրոպական հանձնաժողովի պատվիրակության ներկայացուցչի հետ, հաղորդում է նախագահի մամլո ծառայությունը: Ռ.Քոչարյանն արդյունավետ է գնահատել Հայաստանի համագործակցությունն ինչպես Եվրամիության որպես կառույցի, այնպես էլ` անդամ երկրների հետ: Ռոբերտ Քոչարյանը Եվրոպական Միության հետ հարաբերություններում նշանակալի առաջընթաց է համարել Եվրոպական հարեւանության քաղաքականության շրջանակում Հայաստան-Եվրամիություն Գործողությունների համատեղ ծրագրի շուրջ բանակցությունների սկիզբը եւ հույս է հայտնել, որ այն մոտակա ժամանակներս կավարտվի: «Հայկական կողմի ներկայացրած առաջարկությունների փաթեթը վկայում է, որ մենք բոլոր ուղղություններով տրամադրված ենք լուրջ աշխատանքի եւ ակնկալում ենք համատեղ արդյունավետ գործունեություն»,- ընդգծել է Ռոբերտ Քոչարյանը:
Դիվանագետների հետ զրույցի հիմնական թեմաներից է եղել ղարաբաղյան հակամարտության կարգավորման ներկա փուլը, որի վերաբերյալ Հայաստանի նախագահը տվել է պարզաբանումներ եւ նշել, որ ստեղծվել են որոշ նախադրյալներ, որոնք կարող են գործնական առաջընթաց արձանագրել բանակցային գործընթացում: Բացի այդ, Հայաստանի նախագահը պատասխանել է հանդիպման մասնակիցներին հետաքրքրող հարցերին, որոնք հիմնականում առնչվել են հարեւան երկրների հետ հարաբերություններին, էներգետիկայի ոլորտին: