«Կանխենք գազի գնի բարձրացումը» նախաձեռնության անդամ Անդրեաս Ղուկասյանը լրագրողների հետ հանդիպման ժամանակ նշեց, որ երեկ գազի գնի թանկացման հետ կապված Հանրային ծառայությունները կարգավորող հանձնաժողովի քննարկումներն իրականացվել են օրենքի կոպիտ խախտումներով: Քննարկմանը չի թույլատրվել մասնակցել հասարակական սեկտորը ներկայացնող 400 մարդու և ԶԼՄ ներկայացուցիչներին:
«Մենք նախատեսում ենք այդ խախտումների վերաբերյալ 7 օրվա ընթացքում դիմել դատարան: Նշվում է, որ գազի սակագնի թանկացումը պայմանավորված է սահմանի վրա գազի գնի թանկացման հետ: Մինչ այսօր ոչ ոք չի ներկայացրել «ՀայՌուսգազարդի» և «Գազպրոմի» թանկացման վերաբերյալ պայմանագիրը, այն շարունակում է գաղտնի մնալ: Մենք ցանկացել էինք տեսնել պայմանագիրը, սակայն մերժում ենք ստացել»,- ասել է նա:
Ղուկասյանը պնդում է, որ գների բարձրացումը արհեստական է: Ըստ նրա, Երևանի բնակիչները վճարում են նրա համար, որ գազիֆիկացվել է ողջ հանրապետությունը, քանի որ գյուղերում գազ կա, բայց դրանից չեն օգտվում.
«ՀայՌուսգազարդի» աշխատակիցները ցանկանում են ավելի շատ աշխատավարձ ստանալ, այդ պատճառով էլ իրականացնում են այդ քաղաքականությունը: Թանկացման մյուս պատճառն այն է, որ երկրում մեծ արտագաղթ է, և արհեստական թանկացումներն արվում են մյուսների հաշվին շահույթ ստանալու համար: Սա լրջագույն քաղաքական խնդիր է, որից կախված է մեր երկրի ապագան»,- ասաց Ղուկասյանը` եզրափակելով, որ գների բարձրացման դեմ պայքարում են միայն նրանք, ովքեր չեն վախենում իշխող համակարգից, այդ պատճառով էլ նրանց թիվը մեծ չէ:
