Ազգային ժողովի վերջին քառօրյայի ընթացքում և շոու կար, և պոպուլիզմ և չարախնդում, կարծում է «Հանրապետական» խմբակցության ղեկավար Գալուստ Սահակյանը: Այսօր ԱԺ ավանդական ճեպազրույցների ժամանակ նա նշեց, որ քառօրյան ակտիվ անցավ, ինչից ինքն իրեն շատ լավ է զգում: «Բոլոր քաղաքական ուժերը կարողացան օգտագործել իրենց հնարավորությունները, հայտնեցին իրենց տեսակետները»,- ասաց նա:
Մեկնաբանելով ընդդիմադիր գործիչների տեսակետը, թե իշխանությունները սկսել են սուր քննադատություններ հնչեցնել երկրում ստեղծված իրավիճակի շուրջէ մոնոպոլիզացնելով նաև քաղաքական դաշտը, ՀՀԿ խմբակցության ղեկավարը հայտարարեց, որ իրենք ընդդիմության աթոռի վրա աչք չունեն:
«Քաղաքական խնդիրներ կան, որ իր վրա պետք է վերցնի ընդդիմությունը: Բայց ընդդիմությունը, չնայած որոշ ակտիվ գործիչների, զրոյական դաշտից դուրս չի եկել: Մենք և իշխանության դերն ենք կատարում, և ընդդիմության: Ընդամենը ընդդիմության բեռն ենք տանում»,- ասաց Գալուստ Սահակյանը: Նա նշեց, որ երբ ասում է՝ ընդդիմնությունը զրո է, նկատի ունի այն, որ կարող է թիվ դառնալ և այժմ հարցն այն է, թե զրոյից առաջ թվանշան կդնեն, թե հետո:
