Կիպրոսը հերքում է իր օդային տարածքը փակելու մասին լուրերը
Կիպրոսի իշխանությունները հերքել են ԶԼՄ-ներում հայտնված Eurocontrol –ի հաղորդագրություններն այն մասին, թե Կիպրոսի օդային տարածքը փակ է ռադիոլոկացիոն սարքավորումների խափանման պատճառով: Eurocontrol-ը հետևում է օդային երթևեկությանը Եվրոպայում: ԻՏԱՐ-ՏԱՍՍ-ի թղթակցի հետ զրույցում քաղավիացիայի դեպարտամենտի տնօրեն Յակոբոս Դիմիտրիուն հայտարարել է. «Օդային տարածությունը չի փակվել, թեև, հնարավոր է, անսարքություններ եղել են»:
«Էրմե էյրփորթս» ընկերության ներկայացուցիչ Ադամոս Ասպիրիսը, որը կառավարում է Կիպրոսի երկու օդանավակայանները՝ Լառնակայում և Պաֆոսում, հայտարարել է, որ չի կարող ոչ հաստատել, ոչ հերքել հաղորդագրությունը: «Սակայն, այս պահի դրությամբ մենք խնդիրներ չունենք չվացուցակների կատարման հետ»,-ասել է նա:
