ԱԺ գարնանային նստաշրջանն, ըստ «Հանրապետական» խմբակցության քարտուղար Հովհաննես Սահակյանի, ակտիվ էր: «Վերջին տարիներին երկրում ընտրական գործընթացներ էին, և ասել, որ ԱԺ աշխատանքները որևէ բանով առանձնացան, այդքան էլ ճիշտ չի լինի: Միշտ էլ ընտրական պրոցեսների ժամանակ քաղաքական որոշակի ակտիվություն կա»,- PanARMENIAN.Net ի թղթակցի հետ զրույցում ասաց Հովհաննես Սահակյանը` ամփոփելով նստաշրջանի աշխատանքները:
«Հանրապետական» խմբակցությունը` գարնանային նստաշրջանում
Հովհաննես Սահակյանը նկատեց, որ ՀՀԿ-ն քաղաքական մեծամասնություն է, և կառավարության կողմից, և ՀՀԿ պատգամավորների կողմից օրենսդրական նախաձեռնություններ ներկայացնելու ակտիվություն կա: Նա առանձնացրեց նվազագույն աշխատավարձի չափի մասին օրինագիծը, ինչպես նաև երկրապահի կարգավիճակ տալու մասին նախագիծը, որոնք ընդունեցին այս նստաշրջանում: «Մենք, կառավարության հետ համագործակցելով, բազմաթիվ կարևոր նախագծեր ընդունեցինք և դարձան օրենք»,- ասաց նա:
Քաղաքական բանավեճեր ու քննարկումներ
Այսօրվա Ազգային ժողովը, քաղաքական թիվ մեկ հարթակը բազմակարծության ամբիոն է, ասում է ՀՀԿ խմբակցության քարտուղարը: «Որևէ նախաձեռնություն կամ միտք առանց պատասխանի և արձագանքի չի մնում: Մի մթնոլորտ է ձևավորվել, երբ մեր ընդդիմադիր պատգամավորներն անկաշկանդ ներկայցնում են իրենց տեսակետները` որքան էլ դրանք չեն համընկնում մեծամասնության տեսակետին կամ իրականության հետ: Ընդդիմադիրների` նախաձեռնություններ ներկայացնելու, խոսելու, քննադատելու հնարավորությունն այս գումարման Ազգային ժողովում իրականություն է: Այդ ինստիտուտը կայացել է»,- եզրափակեց Հովհաննես Սահակյանը:
