Պաշտպանության նախարար Սեյրան Օհանյանն օգոստոսի 9-ին այցելել է հանրապետության հարավարևելյան սահմանագոտի: Պաշտպանական գերատեսչության ղեկավարը եղել է հայ-ադրբեջանական սահմանագծում տեղակայված մարտական հենակետերում, ծանոթացել մարտական հերթապահություն իրականացնող զինծառայողների պատրաստությանը և բարոյահոգեբանական վիճակին: Այս մասին PanARMENIAN.Net-ին հայտնում են ՊՆ տեղեկատվության և հասարակայնության հետ կապերի վարչությունից:
Սեյրան Օհանյանը առանձնազրույցներ է ունեցել զինծառայողների և սպաների հետ: Նա գոհունակությամբ նշել է, որ բանակում դրական միտումներ են արձանագրվել զինվորների ֆիզիկական պատրաստության ասպարեզում, զգալիորեն բարելավվել են զինծառայողների սոցիալ-կենցաղային պայմանները: Նախարարը ծանոթացել է նաև սպաների համար նախատեսված բազմաբնակարան շենքի կառուցման աշխատանքների ընթացքին:
Հաջորդ օրը` օգոստոստի 10-ին ՀՀ պաշտպանության նախարար Սեյրան Օհանյանը մասնակցել է Մովսես գյուղի օրվան նվիրված հանդիսավոր միջոցառումներին, որին ներկա էին նաև ՀՀ առողջապահության նախարար Դերենիկ Դումանյանը, Հայաստանի Հանրապետական Կուսակցության փոխնախագահ Գալուստ Սահակյանը, Տավուշի մարզպետ Արմեն Ղուլարյանը, բարձրաստիճան զինվորականներ, Մովսես գյուղի բնակիչներ:
Միջոցառման սկզբում հյուրերը ներկա են գտնվել Սուրբ Աստվածածին եկեղեցում մատուցված Սուրբ պատարագին, որից հետո եկեղեցու բակում տեղի է ունեցել հայ մեծանուն բանաստեղծ Հովհաննես Թումանյանի կիսանդրու բացման արարողությունը: Այնուհետև Սեյրան Օհանյանը ծաղիկներ է դրել Մովսես գյուղի Հայրենական Մեծ պատերազմի և Արցախյան ազատամարտի տարիներին զոհվածների հիշատակը հավերժացնող հուշակոթողին:
Մովսես գյուղի օրվան նվիրված հանդիսավոր նիստում ելույթ է ունեցել նաև ՀՀ պաշտպանության նախարար Սեյրան Օհանյանը: Իր և պաշտպանության նախարարության կողմից ողջունելով և շնորհավորելով ներկաներին Մովսես գյուղի օրվա կապակցությամբ Ս.Օհանյանը նշել է. «Խոսելով Մովսես գյուղի մասին կարելի է մի քանի խորհրդանշական եզրակացություններ կատարել: Հազարամյա պատմություն ունեցող այս գյուղը շարունակել է պահպանել իր պատմական այն բոլոր ավանդույթները, որոնք բնորոշ են հայ ժողովրդին, բնորոշ են նրա պատմության շարունակականությանը, բնորոշ են պայքարին: Հենց դա է հնարավորություն տվել, որպեսզի Մովսես գյուղը միշտ լինի համախմբված դժվարագույն պայմաններում: Մովսես գյուղը այսօր մի յուրահատուկ ամրոց է, որը պահպանում է Տավուշի մարզի նշված տարածքը»:
Խոսելով Հայրենական մեծ պատերազմում և Արցախյան ազատամարտում Մովսես գյուղի բնակիչների ներդրած ավանդի մասին` Սեյրան Օհանյանը շեշտել է, որ Մեծ հայրենականի տարիներին մովսեցիներից 402 կամավորականներ են մեկնել մարտադաշտ, և իրենց ավանդը ներդրել ընդհանուր հաղթանակի մեջ: «Նրանցից 207-ը չվերադարձավ և նրանց օրինակի ու հերոսական կերպարի շնորհիվ է, որ մեր սերնդակից մովսեսցիներից 484-ը կռվեցին և իրենց մեծ ներդրումն ունեցան Արցախյան ազատամարտում: Նրանց անձնվիրության շնորհիվ է, որ մենք այսօր կարողանում ենք ոչ խաղաղություն, ոչ պատերազմ պայմաններում ապահովել մեր սահմանամերձ բնակավայրերի մարդկանց խաղաղ արարումը»:
Սեյրան Օհանյանը նաև ընդգծել է, որ Մովսես գյուղի բնակիչները կարող են համոզված լինել, որ իրենք այսօր միայնակ չեն: «Նրանց թիկունքում են իրենց բոլոր համագյուղացիները, այդ թվում նաև նրանք, ովքեր գտնվում են արտասահմանում, այնտեղ հաջողությունների են հասել և դրա հետ մեկտեղ աշխատում են օգտակար լինել իրենց հարազատ գյուղին»: Նախարարը նաև նշել է, որ պաշտպանության նախարարությունն ավելացնելու է սահմանամերձ բնակավայրերի պայմանագրային զինծառայողների քանակը, քանի որ դրանով, բացի պաշտպանությունից, նաև սոցիալական խնդիրներ են լուծվում: «Իսկ սահմանների ինժեներական սարքավորման աշխատանքները լինելու են շարունակական, բանակը լինելու է զգոն, որպեսզի մարդիկ միշտ վստահ լինեն, որ մենք իրենց կողքին ենք»:
Հանդիսավոր միջոցառման ավարտին Սեյրան Օհանյանը Մովսես գյուղի մի շարք ազատամարտիկների պարգևատրել է գերատեսչական մեդալներով:
