Հայաստանի պաշտպանության նախարար Սերժ Սարգսյանը գտնում է, որ ՆԱՏՕ-ի հետ Հայաստանի հարաբերությունները զարգանում են արագ տեմպերով: Ինչպես հաղորդել է PanARMENIAN.Net-ին ՀՀ պաշտպանության նախարարի մամլո քարտուղար, գնդապետ Սեյրան Շահսուվարյանը, պաշտպանության նախարարը հայտնել է այդ մասին ԱՄՆ-ի պետքարտուղարի Եվրոպայի եւ Եվրասիայի հարցերով օգնական Դենիել Ֆրիդի գլխավորած պատվիրակության անդամ ԱՄՆ եվրոպական հրամանատուրթյան ներկայացուցիչ գնդապետ Մայք Անդերսենի հետ ունեցած հանդիպման ժամանակ: Մայք Անդերսենը եվրոպական հրամանատարության ղեկավարության անունից շնորհակալություն հայտնեց Իրաքում հայ խաղաղապահների հաջող առաքելության համար` բարձր գնահատելով նրանց պրոֆեսիոնալ մակարդակը: Նա հատուկ շնորհակալություն հայտնեց նախարարին պաշտպանական գնահատման ընթացքում ՀՀ ՊՆ ղեկավարության ու սպայակազմի կողմից ցուցաբերված աջակցության եւ ՀՀ զինված ուժերի թափանցիկության համար: Անդրադառնալով հայկական բանակում իրականացվող բարեփոխումների ընթացքին` նախարարը փաստեց, որ 10 տարի անց Հայաստանը կունենա առավել փոխգործունակ եւ միջազգային չափանիշներին համապատասխանող զինված ուժեր: