«Նրանց համար, ով ուրախացել է Սաֆար Աբիևի պաշտոնանկության համար, ես վատ նորություն ունեմ: Ըստ իմ տեղեկությունների, շուտով նրան կնշանակեն ոչ պակաս կարևոր պաշտոնի: Կտեսնեք, որ իշխանությունը չի զրկի իր ուշադրությունից մի մարդու, որը 1995 թ. ի վեր զբաղեցնում էր Ադրբեջանի ամենակարևոր պաշտոններից մեկը»,-հայտարարել է ադրբեջանցի ռազմական փորձագետ, պաշտոնաթող գեներալ-լեյտենանտ Ուզեիր Ջաֆարովը՝ մեկնաբանելով Ադրբեջանի ՊՆ ղեկավար Սաֆար Աբիևի պաշտոնանկությունը, հայտնում է Salamnews-ը:

Ըստ Ջաֆարովի, նա եղել է նրանցից մեկը, ով ամենից շատն է քննադատել Սաֆար Աբիևին բանակաշինության ոլորտում անգործության համար: «Բայց գտնում եմ, որ նորանշանակ նախարար Զաքիր Հասանովի նորմալ ու ազատ գործունեության համար պետք է ազատվի զբաղեցրած պաշտոնից ամեն չափ ու սահման անցնող Գլխավոր շտաբի պետ Նաջիմեդդին Սադիխովը»,-հայտարարել է փորձագետը:

Ըստ նրա, պաշտոնից պետք է ազատվի նաև ադրբեջանական բանակի պատահական գեներալներից մեկը՝ Չինգիզ Մամեդովը: «Մի խոսքով, նոր նախարարի համար շատ դժվար ու պատասխանատու շրջան է սկսվում»,-ասել է փորձագետը:

Իր հերթին haqqin.az-ը գրում է, որ վերջին 10 տարում Ադրբեջանի ռազմական բյուջեն աճել է 23 անգամ, սկսել է ՌԱՀ ստեղծման գործընթացը, արդիական զենք է գնվում: «Սակայն այդ ներդրումները սպասվող արդյունքը չտվեցին: Բանակում համատարած կոռուպցիա է տիրում, բացակայում է կարգապահությունը զորամասերում, անձնակազմը չունի անհրաժեշտ մարտական պատրաստվածություն: Պաշտպանության նախարարությանը չհաջողվեց նաև շտկել բանակում ոչ մարտական կորուստների վիճակագրությունը: Ամեն տարի ադրբեջանական բանակը ոչ մարտական պայմաններում այնքան կորուստներ էր կրում, որ դա հանգեցնում էր լայնածավալ բողոքի ակցիաների՝ քաղաքական ճգնաժամ սերմանելով երկրում: Հասարակության դժգոհությունը, որն անցած գարնանը աղմկահարույց բողոքի ակցիաների վերածվեց, ներքաղաքական ճգնաժամ առաջացրեց»,-գրում է haqqin.az-ը:

Հոկտեմբերի 22-ին Ադրբեջանի նախագահ Իլհամ Ալիևը հրամանագիր է ստորագրել Զաքիր Հասանովին Ադրբեջանի ՊՆ ղեկավար նշանակելու մասին: Մինչ այդ նա ՆԳՆ զորքերի հրամանատարն էր: