Ասադ. Սաուդյան Արաբիայի, Քաթարի ու Թուրքիայի շահերը հակասում են Սիրիայի շահերին21 հունվարի 2014 - 16:53 AMT PanARMENIAN.Net - «Ժնև-2-ի» շեմին Սիրիայի նախագահ Բաշար Ասադը հարցազրույց է տվել AFP գործակալությանը, որտեղ գնահատական է տրվում ընդդիմությանն ու Արևմուտքի երկրներին: Մասնավորապես Ասադը նշել է, որ Սաուդյան Արաբիայի, Քաթարի ու Թուրքիայի շահերը հակասում են Սիրիայի շահերին: «Այդ պետությունները սատարում են ահաբեկիչներին, նրանք իրենց ավանդն ունեն Սիրիայում արյունահեղության մեջ: Ինչ վերաբերում է շահերին, ապա պետք է հարցնեմ ինքս ինձ. արդյո՞ք Սիրիայի ժողովուրդն ընդհանուր շահեր կունենա այդ երկրների հետ այն ամենից հետո, ինչ կատարվեց, այսքան արյուն հեղելուց հետո: Ես չեմ ցանկանում պատասխանել Սիրիայի ժողովրդի փոխարեն: Եթե մարդիկ գտնեն, որ կան ընդհանուր շահեր, և այդ երկրները կփոխեն իրենց վարած քաղաքականությունն ու կհրաժարվեն ահաբեկչությանը սատարելուց, ապա, միանգամայն հավանական է, որ Սիրիայի ժողովուրդը կարող է համաձայնվել նրանց հետ հարաբերությունների վերականգնմանը: Ես որպես նախագահ չեմ կարող միանձնյա պատասխան տալ սիրիացի ժողովրդի անունից: Դա պետք է լինի քաղաքացիների որոշումը»,-ասել է Ասադը: Անդրադառնալով Ֆրանսիայի դիրքորոշմանը՝ Սիրիայի նախագահը նշել է, որ 2011 թ. ի վեր Ֆրանսիան կատարում է Սիրիայում արևմտյան քաղաքականության շահերն առաջ տանողի դերը, երբ նախագահ դարձավ Սարկոզին: Այդ դերը նա ստանձնել էր ԱՄՆ հորդորով: Ֆրանսիայի ու Բուշի վարչակազմի միջև պայմանավորվածություն կար այդ հարցում, քանի որ Ֆրանսիան, որն արաբների ու Սիրիայի վաղեմի գործընկերն էր, հարմար էր այդ դերի համար: «Այն ժամանակ Սիրիայից պահանջեցին Իրանին ու «Հեզբոլլահին» դեմ դուրս գալ և դադարեցնել աջակցությունը դիմադրության ուժերին տարածաշրջանում: Բայց այդպիսի քաղաքականությունը հաջողությամբ չպսակվեց, քանի որ նպատակներն ակնհայտ էին: Այն ժամանակ էլ սկսվեց այսպես կոչված «արաբական գարունն» ու Ֆրանսիան, չկարողանալով կատարել ԱՄՆ-ին տված խոստումը, սկսեց Սիրիային դեմ գործել: Ահա ինչու փոխվեց Ֆրանսիայի դիրքորոշումը 2011 թվականին: Այն ժամանակվանից ի վեր, երբ 2001 թվականին ահաբեկչական հարձակում կատարվեց Նյու Յորքում, չկա ոչ մի եվրոպական քաղաքականություն և եվրոպական լուծում, եթե խոսելու չլինենք 90-ականների մասին: Արևմուտքում կա միայն ամերիկյան քաղաքականություն, որն առաջ են տանում մի քանի եվրոպական երկրներ: Դա տեսանելի է մեր տարածաշրջանի օրինակով: Այսօր մենք տեսնում ենք նույնը՝ կամ եվրոպական քաղաքականությունը ձևավորվում է ամերիկյան հովանու տակ, կամ ամերիկյան քաղաքականությունն եվրոպացիներն ընդունում են որպես սեփականը: Ես չեմ հավատում, որ Եվրոպան, մասնավորապես Ֆրանսիան, կարող է ինչ-որ առանցքային դերակատարություն ունենալ Սիրիայի կամ հարևան երկրների ապագայում: Գոյություն ունի միայն մեկ պատճառ. արևմտյան պաշտոնյաները կորցրել են վստահությունը: Նրանք արդեն չեն առաջնորդվում երկակի չափանիշներով, նրանք արդեն եռակի ու քառակի չափանիշներ ունեն: Նրանք ամեն տեսակի չափանիշներ ունեն յուրաքանչյուր քաղաքական իրավիճակի համար: Նրանք կորցրել են վստահությունը, նրանք ծախեցին իրենց սկզբունքները շահերի դիմաց, ուստի նրանց հետ անհնար է հետևողական քաղաքականություն վարել: Վաղը նրանք կարող են անել միանգամայն հակառակը: Ուստի, չեմ կարծում, որ Ֆրանսիան ինչ-որ դերակատարություն կունենա ապագայում, եթե լիովին չվերանայի իր քաղաքականությունը և իրոք անկախ պետություն չդառնա, ինչպիսին նախկինում էր»,-ասել է Ասադը: Նա նաև նշել է, որ արևմտյան պաշտոնյաներն ամենևին չեն հասկանում, թե ինչ է կատարվում տարածաշրջանում, նրանք ունակ չեն տեսնելու ներկան ու ապագան: Ասադը գտնում է, որ նրանք միշտ շատ ուշ են գիտակցում շատ բաներ, երբեմն, միայն այն ժամանակ, երբ իրողությունն արդեն ամբողջապես փոխվել է: «Եվ շատ դժվար է հասկանալ՝ դա նավթադոլարների ազդեցությունն է համաշխարհային ասպարեզում: Օրինակ, Քաթարը մարգինալ պետությունից վերածվեց կարևոր ուժի, իսկ Ֆրանսիան դարձավ Քաթարի քաղաքականության կամակատարը: Նույնը տեղի է ունենում Ֆրանսիայի ու Սաուդյան Արաբիայի միջև: Ի՞նչ կարող են նավթադոլարներն անել արևմտյան երկրների հետ, հատկապես Ֆրանսիայի հետ, եթե նրանք ծախում են իրենց սկզբունքներն ու Ֆրանսիական հեղափոխության սկզբունքները մի քանի միլիոն դոլարով: Կան շատ այլ բաներ, որոնք դժվար է հասկանոլ ու ընդունել»: Ինչ վերաբերում է առաջիկա «Ժնև-2» խորհրդաժողովին, ապա նախագահ Ասադը նշել է, որ ամենակարևորն այն է, որ Ժնևի խորհրդաժողովը հստակ արդյունքներ ունենա Սիրիայում ահաբեկչության դեմ պայքարի առումով: «Մասնավորապես, նա պետք է հաստատի, որ հարկավոր է ճնշում գործադրել այն երկրների հանդեպ, որոնք ահաբեկչություն են արտահանում, գրոհայինների են գործուղում, փող ու զենք են մատակարարում ահաբեկչական կազմակերպություններին: Այդպիսի պետություններ են Սաուդյան Արաբիան, Թուրքիան ու, անշուշտ, արևմտյան երկրները: Դա ամենակարևոր արդյունքը կարող է լինել, որը կարող է ունենալ Ժնևի խորհրդաժողովը: Ցանկացած քաղաքական որոշում առանց ահաբեկչության դեմ պայքարի ոչ մի նշանակություն չի ունենա: Չի կարող քաղաքական գործընթաց լինել, երբ ամենուր գործում են ահաբեկիչները, ոչ միայն Սիրիայում, այլ նաև հարևան երկրներում: Եթե քաղաքական տեսակետից մոտենանք, ապա «Ժնև-2»-ը կարող է իր ավանդն ունենալ սիրիացիների միջև երկխոսության առումով: Սիրիայում պետք է ներսիրիական գործընթաց գնա, իսկ «Ժնև-2»-ը կարող է միայն սատարել դրան, բայց չի կարող փոխարինել»,-ասել է Սիրիայի նախագահը: Ասադը նշել է, որ չի տեսնում վարչապետի պաշտոնում, օրինակ, Ահմադ Ջարբուին կամ Մուազ ալ Հաթիբին: Ըստ նրա, այդ մարդիկ չեն ներկայացնում Սիրիայի ժողովրդին կամ նրա մի մասը: «Պատկերացնում են արդյո՞ք իրենք իրենց այդ պաշտոնում, որոնք ստեղծել են այդ կառույցները: Դա վերադարձնում է մեզ նույն հարցին. այդ խմբերից յուրաքանչյուրը ներկայացնում է իրեն ստեղծած երկիրը: Սա առաջինը: Երկրորդը՝ ենթադրենք, մենք պայմանավորվել ենք կառավարության կազմում այդ անձանց ընդգրկելու մասին: Ի՞նչ եք կարծում, նրանք կհամարձակվեն Սիրիա գալ: Իհարկե, ոչ: Անցայլ տարի նրանք պնդում էին, թե վերահսկում են Սիրիայի տարածքի 70 տոկոսը, բայց նույնիսկ այն ժամանակ նրանք չհանդգնեցին մեկնել այն շրջաններ, որոնք իբր վերահսկում էին: Նրանք ժամանում են սահմանի մոտ 30-րոպեանոց ֆոտոսեսիայի համար, հետո փախչում են: Ինչպե՞ս նրանք կարող են նախարարներ լինել: Կարո՞ղ է արդյոք օտարերկրացին Սիրիայի նախարար դառնալ: Ահա թե ինչու են այդ առաջարկներն անիրական, դրանք լավ կատակի են նման»,-ասել է Ասադը: Հարցազրույցի վերջում Ասադը նշել է, որ Ռուսաստանի, Չինաստանի ու Իրանի աջակցությունը կարևոր էր, առանց որի, հավանաբար, ամեն ինչ շատ ավելի բարդ կլիներ: Ինչպե՞ս: Հիմա դժվար է ասել: «Ինչ անձամբ ինձ է վերաբերվում, ապա եթե Սիրիայի ժողովուրդն այլ նախագահ ուզի, ես խնդիր չունեմ: Ես այն մարդը չեմ, որը կառչում է իշխանությունից: Անձամբ ինձ համար դա խնդիր չէ»,-ասել է Բաշար Ասադը: 2011 թ. մարտին սկսված հակամարտության ընթացքում Սիրիայում զոհվել է շուրջ 125 հազար մարդ, մոտ 4,2 միլիոնը փախստական են դարձել սիրիական տարածքում, երկու միլիոն մարդ փախել է հարևան երկրներ: Փախստականների ընդունման հիմնական բեռն ընկել է Հորդանանի, Իրաքի, Լիբանանի ու Թուրքիայի վրա: Սիրիայի բնակչության ընդհանուր քանակը մինչ պատերազմը կազմում էր 20 միլիոն: Սիրիական կարգավորման «Ժնև-2» միջազգային խորհրդաժողովը կանցնի երկու փուլով: Այն կմեկնարկի հունվարի 22-ին շվեյցարական Մոնտրյո քաղաքում, իսկ հետո հունվարի 24-ին կշարունակվի Ժնևի Ազգերի պալատում: Հղումներ թեմայով. Ուշագրավ Այցն աշխատանքային է Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական Կավելացվեն ծախսերը նաև հատուկ նշանակության նախագծերի ֆինանսավորման համար
Շատերը զրկվել են տանիքից և գիշերում են փողոցում Ամենաընթերցվողը բաժնում | Բերման է ենթարկվել անհնազանդության ակցիաների 29 մասնակից, որից 17–ը՝ Երևանում Վեդիում բերման է ենթարկվել Լևոն Քոչարյանը Amnesty International․ Ադրբեջանի կողմից էական առաջընթաց չի գրանցվել ԼՂ հայերի ապահով վերադարձի համար Նշվում է, թե Ադրբեջանի իշխանությունները համաներում էին խոստացել նրանց, ովքեր կռվել են Լեռնային Ղարաբաղի համար ԱԺ նախագահ․ Դրական եմ վերաբերվում, եթե ՀՀ–ն գազ գնի Ադրբեջանից Ըստ նրա՝ սահմանին սյուն տեղադրելը նշանակում է, որ Հայաստանն ու Ադրբեջանն իրարից տարածքային պահանջներ չունեն Զախարովա․ՌԴ–ն պատրաստ է աջակցել ՀՀ–ին և Ադրբեջանին սահմանազատման և ԼՂ հուշարձանների պահպանման հարցերում «Պայմանավորվածությունները պետք է լինեն կայուն, հավասարակշռված և փոխընդունելի»,–ասել է նա |