Ապրիլի 24-ը Բուենոս Այրեսում առաջարկում են հայտարարել ХХ դարի առաջին ցեղասպանության օր

5 ապրիլի 2014 - 12:11 AMT

PanARMENIAN.Net - Բուենոս Այրեսի օրենսդիր խորհուրդն ապրիլի 3-ին Հայոց ցեղասպանության 99-րդ տարելիցին ընդառաջ ընդունել է Վիրջինիա Գոնսալեսի ու Ռաքել Հերերոյի օրինագիծը, որն առաջարկում է ապրիլի 24-ը հայտարարել ХХ դարի առաջին ցեղասպանության օր:

Ինչպես հայտնում է Prensa Armenia-ն, խորհուրդը նաև ընդունել է Պաբլո Ֆերեյրայի նախագիծը, որով կրթության նախարարությանն առաջարկվում է այդ օրը տարբեր ժողովրդների հանդեպ հանդուրժողականության դասեր անցկացնել: «Կրթությունը կարևոր փուլ է մարդու իրավունքները հարգելու ու պաշտպանելու ուսուցման գործում: Ուստի, շատ կարևոր է աջակցել կրթական գործընթացում ցեղասպանության մասին տեղեկությունների ընդգրկմանը: Մենք պետք է ոչ միայն հիշենք այդ փաստերը, այլ նաև ծանոթ լինենք այն պայմաններին, որոնք հնարավոր դարձրեցին այդ վայրագ ու անմարդկային գործողությունները», -ասվում է Ֆերեյրայի հայտարարության մեջ:

Հայոց ցեղասպանության զոհերի հիշատակի օրը կնշեն նաև Նիդերլանդներում: Ինչպես PanARMENIAN.Net ին է հայտնել Նիդերլանդների Հայկական կազմակերպությունների ֆեդերացիան (FAON), ապրիլի 22-ին Հաագայում կսկսվի բողոքի ակցիա ընդդեմ Օսմանյան կայսրության հանցագործությունների ու ժամանակակից Թուրքիայի գործողությունների սիրիական Քեսաբում: Ակցիան կմեկնարկի Հոլանդիայի խորհրդարանի մոտ, որտեղից ցուցարարներն երթով կգնան դեպի Նիդերլանդներում Թուրքիայի դեսպանություն:

Մարտի 21-ին «Ալ-Քաիդայի» հետ կապեր ունեցող ծայրահեղական «Ջաբհաթ ան Նուսրա» և «Ահրար աշ Շամ» մի քանի հազար հոգանոց խմբավորումները հարձակում են ձեռնարկել Քեսաբի շրջանի վրա՝ Թուրքիայի սահմանի մոտ, որտեղ բնակչության մեծ մասը հայեր են: Անօրինական զինված խմբավորումների հարձակումը, որն ըստ Դամասկողի հավաստման, կատարվել է հրետանային աջակցությամբ, այդ թվում՝ Թուրքիայի տարածքից տանկային համազարկերով, հանգեցրել է մի շարք բնակավայրերի, այդ թվում Քեսաբի ժամանակավոր կորստին: Ահաբեկիչների բարբարոսություններից խուսափելու համար Քեսաբի, Սամրայի, Նաբու ալ Մուրի հայ բնակչությունը լքել է տները և սիրիացի զինվորականների պաշտպանությամբ տեղափոխվել Լաթաքիա: Այժմ այնտեղ ապաստան է գտել մոտ 1800 հայ: Հայկական եկեղեցու խաչի փոխարեն կանգնեցվել է իսլամիստների սև դրոշը: Քեսաբի հայ բնակչության շրջանում զոհեր չկան:

Հղումներ թեմայով.

Prensa Armenia: La Legislatura porteña conmemoró el genocidio armenio y pidió que se lo enseñe en las escuelas

Asbarez: Buenos Aires Law Marks 99th Anniversary of Genocide

Հայոց ցեղասպանություն

Հայոց ցեղասպանությունը, որն իրագործվել է Օսմանյան կայսրությունում 1915-1923թթ., XX դարի առաջին ցեղասպանությունն էր, որի նախաձեռնողները երիտթուրքերն էին: Ցեղասպանության ժամանակ ոչնչացվեց վեց հայկական վիլայեթների բնակչությունը` մոտ 1,5 մլն հայ: Եվս կես միլիոնը սփռվեց աշխարհով մեկ` սկիզբ դնելով հայկական Սփյուռքին:

Դեռևս Ցեղասպանության իրագործման տարիներին` 1915-23թթ. տերությունները ընդունեցին հայերի կոտորածը դատապարտող բանաձևեր: ԱՄՆ-ն երեք անգամ (1916, 1919, 1920) նմանատիպ բանաձևեր է ընդունել, սակայն դա չկասեցրեց Օսմանյան կայսրության գործողությունները: 1915թ. Ֆրանսիան, Մեծ Բրիտանիան և Ռուսաստանը հանդես եկան համատեղ հռչակագրով` դատապարտելով հայերի բնաջնջումը:

Աշխարհի շատ երկրներ և ազդեցիկ միջազգային կազմակերպություններ ճանաչել և դատապարտել են Հայոց ցեղասպանությունը: Պաշտոնապես առաջինը Հայոց ցեղասպանությունն ընդունել և դատապարտել է Ուրուգվայը 1965թ-ին: Հայոց ցեղասպանությունը ճանաչել են նաև Եվրոպայի Խորհուրդը, Եվրախորհրդարանը, ՄԱԿ-ի խտրականության կասեցման և փոքրամասնությունների պաշտպանության կանխարգելման ենթահանձնաժողովը, ՄԱԿ-ի ռազմական հանցագործությունների գծով հանձնաժողովը, Եկեղեցիների համաշխարհային խորհուրդը: Հայերի ոչնչացումը պաշտոնապես ցեղասպանություն են ճանաչել Ֆրանսիան, Ավստրիան, Իտալիան, Գերմանիան, Բելգիան, Լյուքսեմբուրգը, Շվեդիան, Նիդերլանդները, Շվեյցարիան, Ռուսաստանը, Լեհաստանը, Լիտվան, Հունաստանը, Սլովակիան, Կիպրոսի Հանրապետությունը, Լիբանանը, Ուրուգվայը, Արգենտինան, Վենեսուելան, Չիլին, Բոլիվիան, Կանադան, Վատիկանը, Բրազիլիան, Լյուքսեմբուրգը, Գերմանիան, Պարագվայը, Սիրիան և ԱՄՆ-ի 45 նահանգ:

Բելգիայում և Շվեդիայում Հայոց ցեղասպանության ժխտման համար քրեական պատասխանատվություն է սահմանված (45 հազար եվրո տուգանքից մինչև 1 տարվա ազատազրկում): 2006թ. հոկտեմբերի 12-ին Ֆրանսիայի խորհրդարանն օրինագիծ ընդունեց, որի համաձայն Հայոց ցեղասպանության ժխտումը կքրեականացվի, ինչպես Հոլոքոսթը:

Ժամանակակից Թուրքիան ժխտում է Հայոց ցեղասպանության պատմական փաստը և վարում է այդ փաստի ժխտման ներքին և արտաքին քաղաքականություն: Թուրքական պետության գործողությունները ներկայացվում են որպես «բռնագաղթ»` հայերի անվտանգությունն ապահովելու նպատակով: Հայոց ցեղասպանության ճանաչման անհրաժեշտության մասին խոսում են միայն առանձին թուրք մտավորականներ, որոնց թվում են պատմաբան Թաներ Աքչամն ու Նոբելյան մրցանակի դափնեկիր Օրհան Փամուկը: