ԱՄՆ-ն պատրաստ է աջակցել Ա-320-ի կործանման պատճառների հետաքննությանը
Կոնգրեսական Ադամ Շիֆը ուղերձ է հղել Հայաստանի նախագահ Ռոբերտ Քոչարյանին, որտեղ իր ցավակցություն է հայտնել հայ ժողովրդին Ա-320-ի կործանման կապակցությամբ: «Կալիֆորնիայի 29-րդ շրջանի բնակիչների անունից եւ մասնավորապես այստեղ բնակվող հազարավոր հայերի անունից խորապես ցավակցում եմ «Արմավիա» ընկերության ինքնաթիռի վթարի կապակցությամբ: Ես ցավակցում եմ բոլոր զոհերի ընտանիքներին եւ ողջ հայ ժողովրդին: Տեսնելով ողբերգության մասին հաղորդումները, ես խորապես զգացված էի զոհվածների հարազատների վիշտը տեսնելով: Ես կապվեցի Անվտանգ փոխադրումների ազգային խորհրդի հետ, որը ԱՄՆ կառավարության հիմնական կազմակերպությունն է, որ զբաղվում է տրանսպորտային պատահարների, եւ մասնավորապես ավիավթարների, քննությամբ: Կազմակերպությունը պատրաստակամություն հայտնեց աջակցել Հայաստանի եւ Ռուսաստանի իշխանություններին վթարի պատճառների հետաքննության գործում»:
