Մետրոյի «Աջափնյակ» կայարանը` առայժմ միայն թղթի վրա 7 հուլիսի 2014 - 12:18 AMT PanARMENIAN.Net - Երևանի Կարեն Դեմիրճյանի անվան մետրոպոլիտենն ունի 10 կայարան, որոնցից վերջինը` Չարբախը, բացվել է 18 տարի առաջ` 1996-ին: Դրանից հետո տևական ժամանակ խոսում էին Աջափնյակ վարչական շրջանում ևս մեկ կայարանի գործարկման մասին: Դեպի այդ նոր կայարան տանող թունելները փորվել էին դեռևս ԽՍՀՄ տարիներին, նախանշված էր կայարանի մուտքը: Մնում էր Հրազդանի կիրճի վրայով անցնող կամուրջը կառուցել ու անցկացնել գծերը: Սակայն այդ ամենը հսկայական ծախսերի հետ էր կապված և այդպես էլ մնաց թղթի վրա: Հունիսի կեսերին քաղաքապետարանում ներկայացվեցին Երևանի քաղաքապետարանի ու Վերակառուցման և զարգացման եվրոպական բանկի միջև համագործակցության շրջանակում ՎԶԵԲ-ի միջոցներով դեռևս այս տարվա հունվարին բրիտանական URS խորհրդատվական ընկերությանը պատվիրված Երևանի մետրոպոլիտենի` դեպի Աջափնյակ մոտ 3 կիլոմետրանոց նոր ուղեգծի կառուցման իրագործելիության ուսումնասիրության արդյունքները: Ուսումնասիրությունն իրականացրած ընկերության ներկայացուցիչ Դեյվիդ Դենիսը ներկայացրել է նոր ուղեգծի կառուցման 4 հիմնական տարբերակ: Նա նշել է, որ իրականացվել են նաև պահանջվող հետազոտությունների, շահագործման և շարժակազմի, պահանջարկի նախնական ուսումնասիրությունների վերաբերյալ ուսումնասիրություններ, ինչպես նաև` տնտեսական և ուղևորահոսքի կանխատեսման գնահատում: Քաղաքապետարանի հասարակայնության հետ կապերի վարչության պետ Արթուր Գևորգյանը PanARMENIAN.Net ի հետ զրույցում նշեց, որ դա զուտ ուսումնասիրություն է և բուն շինարարության մասին դեռ խոսք գնալ չի կարող. «Մետրոյի նոր կայարանների կառուցումը մշտապես եղել է և կլինի Երևանի զարգացման ծրագրերում, սակայն այլ խնդիր է` երբ պետությունն այդքան գումար կունենա»: Շրջանառվող խոսակցությունների համաձայն` նախկինում փորված թունելները չեն օգտագործվելու և պետք է փորել նորը: Բանն այն է, որ տարիների ընթացքում փոխվել է ուղևորահոսքը: Վերջին ուսումնասիրությունների համաձայն, եթե նոր կայարաններ բացվեն, ուղևորահոսքի տեսանկյունից նպատակահարմար է, որ դրանցից մեկը լինի Հանրապետական հիվանդանոցի շրջակայքում, մյուսն էլ` Գ. Չավուշի արձանի հարակից տարածքում:
Ստացվում է, որ կառուցվելու դեպքում կօգտագործվի ներկայումս փորված թունելներից միայն մեկը` Մերգելյան ինստիտուտից դեպի Հրազդանի ձախ ափ, իսկ աջ ափից պետք է փորվի նոր թունել` դեպի Ֆիզիկայի ինստիտուտ: Երկու թունելը կկապվեն կամուրջով: Միջազգային չափորոշիչներով մետրոյի նոր 1 կմ ուղեգիծ կառուցելու և տեխնիկապես զինելու համար պահանջվում է 75-100 մլն ԱՄՆ դոլար (բաց կամ փակ եղանակով): Դեպի Աջափնյակ մետրո անցկացնելու համար պետք է կառուցել 3 կմ նոր ուղեգիծ, և, հաշվի առնելով տեղանքի բարդությունը, կպահանջվի 300 մլն դոլարից ոչ քիչ: «Մենք, իհարկե, կարող ենք վարկեր վերցնել միջազգային կազմակերպություններից, սակայն աշխարհի ոչ մի երկրում մետրոն ինքնածախսատար չէ: Այն ֆինանսավորվում է պետության կողմից: Վերջին` 2011 թվականի թանկացումն էլ հենց դրանով էր պայմանավորված, քանի որ պետությունն այլևս չէր կարողանում այդքան հատկացում անել, որոշվեց տոմսը թանկացնել, որ գոնե ծախսերի մի մասն էլ հենց մետրոպոլիտենը հոգա»,- նշեց Գևորգյանը: «Մետրոն էկոլոգիապես մաքուր, առանց խնդիրների տրանսպորտային միջոց է, սակայն ոչ շահութաբեր»,- ասաց Գևորգյանը: Անդրադառնալով վերջին տարիներին կատարված ներդրումներին, նա նշեց, որ այդ ընթացքում ՎԶԵԲ-ի ֆինանսավորմամբ թարմացվել է մետրոյի շարժակազմը, փոխվել են գնացնքերի ակները, տեղադրվել պոմպակայաններ, զգալիորեն լուծվել է թունելներից ջրահեռացման խնդիրը: Իր հերթին քաղաքապետի տեղակալ Վահե Նիկոյանը, ընդգծելով մայրաքաղաքի զարգացմանը զուգընթաց աճող տրանսպորտային հոսքերի ծավալն ու գերբեռնվածությունը, առանձակի կարևորում է մետրոպոլիտենի զարգացումը: «Մետրոյի ուղեգծի ընդլայնումը կարևորվում է մի շարք հանգամանքներով, մասնավորապես դրա արդյունքում կբեռնաթափվի վարչական շրջանի երթևեկը, տվյալ հատվածներում վերգետնյա հասարակական տրանսպորտի թվի նվազման հաշվին կավելանա ճանապարհների թողունակությունը։ Խնդիրն արդիական է նաև բնապահպանական տեսանկյունից», - նշել է Վահե Նիկոյանը: ՎԶԵԲ-ի` իրագործելիության ուսումնասիրության առաջարկները հետագայում կօգտագործվեն Երևան քաղաքի հեռանկարային զարգացման հնարավորությունների քննարկումների ժամանակ։ Քրիստինե Քյուրքլյան / PanARMENIAN.Net Ուշագրավ Վարդանյանն ասել է, որ գտնվում է մեկուսացման խցում Նրանք ձերբակալվել են խուլիգանական արարքների կատարման մեջ մասնակցության կասկածանքով Փաշազադեն հայտարարել էր, թե «հայկական եկեղեցին, ռևանշիզմ է քարոզում” Հավաքի նպատակն է քննարկել ու բարձրաձայնել Արցախի ժողովրդի առաջարկներն ու պահանջները Ամենաընթերցվողը բաժնում | Amnesty International․ Ադրբեջանի կողմից էական առաջընթաց չի գրանցվել ԼՂ հայերի ապահով վերադարձի համար Նշվում է, թե Ադրբեջանի իշխանությունները համաներում էին խոստացել նրանց, ովքեր կռվել են Լեռնային Ղարաբաղի համար ԱԺ նախագահ․ Դրական եմ վերաբերվում, եթե ՀՀ–ն գազ գնի Ադրբեջանից Ըստ նրա՝ սահմանին սյուն տեղադրելը նշանակում է, որ Հայաստանն ու Ադրբեջանն իրարից տարածքային պահանջներ չունեն Զախարովա․ՌԴ–ն պատրաստ է աջակցել ՀՀ–ին և Ադրբեջանին սահմանազատման և ԼՂ հուշարձանների պահպանման հարցերում «Պայմանավորվածությունները պետք է լինեն կայուն, հավասարակշռված և փոխընդունելի»,–ասել է նա Վաշինգտոնում կայացել է ամենամյա Արդարության երթը Երթի մասնակիցներն Ադրբեջանի դեսպանատան մոտից քայլել են դեպի Թուրքիայի դեսպանատուն, հետո դեպի Սպիտակ տուն |