Հետախուզության նախկին ղեկավարը պնդում է` իրենից թաքցրել են Դինքի սպանության մասին տեղեկությունները

Հետախուզության նախկին ղեկավարը պնդում է` իրենից թաքցրել են Դինքի սպանության մասին տեղեկությունները

PanARMENIAN.Net - Պոլսահայ լրագրող Հրանտ Դինքի սպանության ժամանակաշրջանում որպես հետախուզության ղեկավար պաշտոնավարած Սաբիր Ուզունն «Ակօս»-ի խմբագրի սպանության գործով դատավարության ընթացքում ուշագրավ խոստովանություններ է արել, տեղեկացնում է թուրքական Demokrat Haber կայքը:

Նա հայտարարել է, թե Դինքի սպանության վերաբերյալ ստացված հետախուզական տեղեկությունները ոստիկանության որոշ պաշտոնյաներ թաքցրել են իրենից: Նա հայտնել է, որ Էրհան Թունջելի տված տեղեկությունների հիման վրա պատրաստված F4 զեկույցը, որտեղ նշվում էր, որ Հրանտ Դինքը սպանվելու է, իրենից գաղտնի է պահվել, և ոստիկանության որոշ պաշտոնյաներ աչք են փակել Դինքի սպանության վրա:

Ստամբուլի գլխավոր դատախազության ահաբեկչության և խմբավորումների հարցերով գրասենյակի դատախազ Յուսուֆ Հաքքը Դողանը 8 ժամ հարցաքննել է Ուզունին, իսկ նրա՝ 11 էջանոց ցուցմունքում նշված է այն պատասխանատուների անունները, որոնք իրեն պետք է տեղեկացնեին Դինքի հնարավոր սպանության զեկույցի մասին:

Նախկին պաշտոնյան նշել է, որ այդ զեկույցին առնչվող բոլոր փաստերն ու ձայնագրությունները ջնջվել են:

«Եթե դրանք ջնջվել կամ փոփոխվել են, ապա դա արվել է էլեկտրոնային համակարգի 6-7 համակարգիչներից: Դա նշանակում է, որ փորձ է արվել արդարադատությունից թաքցնել իրականությունը: Հանցանքի մասին ապացույցները ոչնչացվել են»,-ասել է Ուզունը, րում է Tert.am-ը:

Ստամբուլում շարունակում է Տրաբզոնի ժանդարմերիայի նախկին պետ Ալի Օզի դատը, որին կասկածում են 2007 թ. հունվարի 19-ին «Ակոս» թերթի գլխավոր խմբագիր Հրանտ Դինքի սպանությանն առնչվող փաստերը թաքցնելու մեջ: Ինչպես գրում է akunq.net-ը, ինքը Օզը ներկա չի եղել նիստին: Նիստին չեն մասնակցել նաև Դինքի ընտանիքի փաստաբան Հասան Բաքիրչիօղլուն և Օզի փաստաբան Ալի Սուրմենը: Այդ պատճառով դատական նիստը կրկին հետաձգվել է, հաջորդ նիստը տեղի կունենա սեպտեմբերի 11-ին:

Հունիսի 7-ին հաղորդագրություն տարածվեց, որ Թուրք պաշտոնյաները, որոնց մեղադրում են հայ-թուրքական «Ակոս» թերթի գլխավոր խմբագիր Հրանտ Դինքի սպանության գործում անփութության և թերանալու համար, կարող են կրկին պատասխանատվության կանչվել, քանի որ Ստամբուլի դատարանը չեղյալ է համարել նախորդ որոշումը: Նախորդ որոշման համաձայն Ստամբուլի նախկին նահանգապետ Էրգուն Գունգորը, Ստամբուլի ոստիկանության ղեկավար Ջելաեդդին Ջերան, Ստամբուլի ոստիկանության հետախուզության նախկին պետ Ահմեդ Իլհան Գյուլերը և ևս 6 ոստիկաններ անմեղ ճանաչվեցին 2007 թ. սպանության գործով:

Ստամբուլի դատարանը խորհուրդ է տվել վերսկսել հետաքննությունը 9 մարդու հանդեպ՝ հետևելով Մարդու իրավունքների եվրոպական դատարանի որոշմանը: Դինքի ընտանիքի փաստաբան Հասան Բաքիրչիօղլուն հաստատել է, որ ներկայումս հետաքննությունը կարող է իրավաբանորեն վերսկսվել, գրում է Hurriyet Daily News-ը:

2014 թ. մարտին ոստիկանության հետախուզության նախկին պետը մեղադրվեց Հրանտ Դինքի գործով թերանալու մեջ ու հեռացվեց հետաքննությունից, թեև սկզբում վարչական դատարանը մերժեց քննությունից նրան հեռացնելու պահանջը: Դատական տեսուչներն իբր պարզել էին, որ ոչնչացված տեղեկատվությունը կարող է կապված լինել այն շրջանի հետ, երբ Դինքը սպանվեց սպառնալիքներ ստանալուց հետո:

Սպանության գործով գլխավոր մեղադրյալ Էրհան Թունջելն ազատ արձակվեց Թուրքիայի նախագահ Աբդուլլահ Գյուլի հրամանով մարտի 11-ին:

Սեպտեմբերի 17-ին Ստամբուլում վերսկսվեց Հրանտ Դինքի սպանության նախապատրաստման մեղադրանքով կասկածյալ Էրհան Թունջելի դատը: Դատարանը ձերբակալության թույլտվություն տվեց, սակայն Թունջելին ազատ արձակվեց Դինքի սպանության գործով առաջին իսկ որոշումից հետո:

«Էրգենեկոնի» և «Ակոս» թերթի գլխավոր խմբագիր Հրանտ Դինքի սպանության գործերով նոր դատախազ նշանակվեց Մուրատ Ինամը, որը փոխարինեց Մուամմեր Աքաշին, որին հեռացրեցին պաշտոնից 2014 թվականի հունվարին: Ինամն արդեն ստացել է գործերի բոլոր նյութերը:

Աքաշը հեռացվեց պաշտոնից, քանի որ մտադիր էր ընդլայնել կոռուպցիայի համար մեղադրվող պաշտոնյաների ցուցակը և քանի որ ինքն էր արտոնել «Մեծ կաշառքի» գործով ձերբակալությունները: Ստամբուլի ոստիկանապետ Սելամի Ալթինոկն այն ժամանակ հրաժարվեց կատարել դատախազի արտոնած ձերբակալությունները: Մուամմեր Աքաշը հունվարի 16-ին նշանակվեց աշխատանքի գլխավոր դատախազ Թեքիրդակի գրասենյակում Թուրքիայի Դատավորների ու դատախազների գերագույն խորհրդի որոշմամբ: 2012 թվականի հունվարի 17-ին դատարանը մեղավոր ճանաչեց 19 մարդու «ահաբեկչական կազմակերպության անդամներ» մեղադրանքով: Յասին Հայալը ցմահ բանտարկության դատապարտվեց, անմիջական հանցագործ Օգյուն Սամասթը՝ 23 տարվա ազատազրկման: Մեղադրյալներն անցնում էին Թուրքիայի ՔՕ 220 հոդվածով՝ սպանության կազմակերպում ու իրագործում:

 Ուշագրավ
«Կանգնած ենք սարի պես, մինչև վերջ կանգնելու ենք»,- ասել է նա
Ըստ քաղխորհրդի՝ Արցախի միջազգային ճանաչումը և բնակչության ինքնորոշումը հակամարտության միակ մշտական լուծումն են
Ցույցի մասնակիցները պատրաստվում են շարժվել Եվրապարլամենտ
ՄԻԵԴ-ը բացառել է ադրբեջանցի սպա Ռամիլ Սաֆարովի գործով վճռի վերանայման հնարավորությունը