Վրաստանն արտաքին գործերի նոր նախարար ունի

12 նոյեմբերի 2014 - 10:42 AMT

PanARMENIAN.Net - Թամարա Բերուչաշվիլին նշանակվել է Վրաստանի ԱԳ նախարար՝ այդ պաշտոնում փոխարինելով Մայա Փանջիկիձեին, որը հրաժարական տվեց անցած շաբաթ ՊՆ ղեկավար Իրակլի Ալասանիայի պաշտոնանկությունից հետո:

Ըստ Civil.ge-ի, Թամարա Բերուչաշվիլին մոտ երկու տասնամյակ աշխատում է Եվրոպայի հետ ինտեգրման հարցերի ոլորտում, իսկ 2013-ի ապրիլից ԱԳ փոխնախարար էր:

2004 թ. նա ինը ամիս զբաղեցրեց եվրոպական և եվրաինտեգրման հարցերի գծով պետնախարարի պաշտոնը, իսկ 2004-2011 թթ. աշխատում էր նույն գերատեսչությունում որպես պետնախարարի տեղակալ:

Վարչապետ Իրակլի Ղարիբաշվիլին, ներկայացնելով նախարարին, հայտարարել է, որ «եվրոպական ընտրությունը վրաց ժողովրդի ընտրությունն է և նրա ամուր կամքը»: «Ես վստահ եմ, որ Թամարա Բերուչաշվիլին իր կարևոր ավանդը կունենա այդ գործում»:

Քաղաքական ճգնաժամը Վրաստանում առաջացավ, երբ վարչապետ Իրակլի Ղարիբաշվիլին ազատեց պաշտոնից պաշտպանության նախարար Իրակլի Ալասանիային աղմկահարույց կոռուպցիոն քրեական գործերի հետքերով: Դրանից հետո հրաժարական տվեցին ԱԳՆ ղեկավար Մայա Փանջիկիձեն, եվրաինտեգրման գծով պետնախարար Ալեքսի Պետրիաշվիլին և մի շարք բարձրաստիճան պաշտոնյաներ: Ալասանիայի թիմը մեղադրում է գործող վարչապետ Իրակլի Ղարիբաշվիլիին Վրաստանում եվրոպական ինտեգրումը խափանելու փորձի համար և կոռուպցիայի քննությունը ՊՆ-ում պատրվակ է համարում ԵՄ հետ ասոցիացիան ձախողելու նպատակով:

Photo: agenda.ge

Հղումներ թեմայով.

Civil.ge: Министром иностранных дел Грузии назначена Тамара Беручашвили

RFE/RL. New Georgian Foreign Minister Announced