Հայաստանը միշտ պատրաստ է երկխոսության իր հարեւանների հետ: Այդ մասին, պատասխանելով «Գոլոս Արմենիի» թերթի ընթերցողների հարցերին, հայտարարել է Հայաստանի խորհրդարանի խոսնակ Տիգրան Թորոսյանը: Նրա խոսքերով, դա վերաբերում է ե'ւ Ադրբեջանին, ե'ւ Թուրքիային: Միեւնույն ժամանակ, Տ.Թորոսյանը նշել է, որ «անհնար է ինչ-որ խնդիրներ լուծել այն պայմաններում, որոնք ստեղծվում են Ադրբեջանում եւ Թուրքիայում, որտեղ արմատավորվում է ատելությունը հայ ժողովրդի հանդեպ»: «Վերջին վկայությունը այդ երկրի համար ամոթաբեր Ամենայն Հայոց կաթողիկոսի ընդունելությունն է Ստամբուլում»,-ընդգծել է ՀՀ ԱԺ խոսնակը: Ինչ վերաբերում է Հայոց ցեղասպանության հարցին, ապա Տ.Թորոսյանը նշել է, որ «տարօրինակ կլիներ, եթե մենք կասկածի տակ դնեինք Ցեղասպանության փաստը եւ սկսեինք թուրքերի հետ քնննարկել եղել դա թե չի եղել»: «Իրենց հետ մենք այլ հարց պետք է քննարկենք` ինչպես առաջ շարժվել: Ցավոք, Թուրքիան իր մեջ ուժ չի գտնում ճանաչելու համար կատարված սխալները եւ հանցագործությունները: Այդպիսով, դա, առաջին հերթին, Թուրքիայի եւ նրա ժողովրդի ներքին խնդիրն է: Հայոց ցեղասպանության փաստը չի կարող քննարկման առարկա լինել»,-հայտարարել է Հայաստանի խորհրդարանի խոսնակը: Ավելին, հավելել է նա, աստիճանաբար մյուս ժողովրդները գիտակցում են, որ ցեղասպանությունը դա հանցագործություն է մարդկության դեմ եւ պետք է ճանաչել այդ փաստը, խուսափելու համար դրա կրկնությունից: «Դրա վկայությունն է Ցեղասպանության ճանաչումը շատ եվրոպական երկրների խորհրդարանների կողմից»,-նշել է Տ.Թորոսյանը: