ԵԱՀԿ ՄԽ-ն հուսով է, որ Հայաստանի և Ադրբեջանի ԱԳ նախարարները կհանդիպեն առաջիկա շաբաթներին

PanARMENIAN.Net - Ցանկացած բռնություն շփման գծում ապակայունացնում է իրավիճակը, և դա կարող է հանգեցնել լարվածության վտանգավոր աճի կողմերի միջև, հայտարարել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը, հայտնում է ԱՊԱ գործակալությունը:

Ըստ նրա, ռազմական գործողությունը կարող է ձախողել Լեռնային Ղարաբաղի հակամարտությունը խաղաղ ճանապարհով լուծելու ջանքերը:

«Կողմերի տեսակետները լսելու համար մենք պարբերաբար այցելում ենք տարածաշրջան, սակայն մեր հերթական այցի ժամկետը դեռ որոշված չէ», ասել է նա:

«Առաջիկա շաբաթներին հնարավոր է նաև հանդիպում կողմերի արտգործնախարարների հետ: Մենք հուսով ենք, որ նախարարները կհանդիպեն ու կկարողանան քննարկել առաջ շարժվելու ուղիները: Մենք հուսով ենք նաև, որ նախագահները կկատարեն 2014-ի հոկտեմբերին Փարիզում ստանձնած պարտավորություններն ու կշարունակեն երկխոսությունը: Հակամարտության կարգավորումը բանակցությունների միջոցով հնարավոր է միմյանց հետ աշխատելու կողմերի քաղաքական կամքի առկայության դեպքում»,-ասել է նա:

ՊԲ օպերատիվ տվյալների համաձայն, հունվարի 13-ին և լույս 14-ի գիշերը ղարաբաղա-ադրբեջանական հակամարտ զորքերի շփման գծում հակառակորդը հրադադարի պահպանման ռեժիմը խախտել է մոտ 150 անգամ` տարբեր տրամաչափի հրաձգային զինատեսակներից հայ դիրքապահների ուղղությամբ արձակելով ավելի քան 1.400 կրակոց: ԼՂՀ ՊՆ մամուլի ծառայությունը հայտնում է, որ պաշտպանության բանակի առաջապահ զորամասերը, անհրաժեշտության դեպքում դիմելով պատասխան քայլերի, շարունակել են վստահորեն իրականացնել մարտական հերթապահություն:

Խաղաղ բնակավայրերը պաշտպանության բանակի համար երբևէ չեն եղել հարվածի թիրախ: Հիշեցնենք, որ տվյալ վարքագիծը եղել ու մնում է ադրբեջանական զինուժի «մենաշնորհը», ինչի ապացույցն են հայ-ադրբեջանական սահմանահատվածին գտնվող հայկական բնակավայրերի վրա հակառակորդի կողմից պարբերաբար իրականացված և իրականացվող գնդակոծություններն ու արկակոծությունները»: