Մամուլի ազատության սանդղակում ՀՀ-ն 78-րդ է. 2014-ի արդյունքը չի փոխվել

12 փետրվարի 2015 - 13:47 AMT

PanARMENIAN.Net - 2015 թվականի մամուլի ազատության սանդղակում Հայաստանը պահպանել է 2014 թվականին գրանցած արդյունքը՝ 180 երկրից բաղկացած ցանկում զբաղեցնելով 78-րդ տեղը: Այդ մասին ասվում է «Լրագրողներ առանց սահմանների» միջազգային կազմակերպության ամենամյա զեկույցում, հայտնում է Tert.am-ը:

Ադրբեջանը զբաղեցրել է 162-րդ տեղը՝ նախորդ տարվա 160-ի փոխարեն: Զեկույցում նշվում է, որ Ադրբեջանի համար վատ տարի է եղել, որի ընթացքում գրանցվել է սանդղակում երկրների միավորների ամենամեծ անկումներից մեկը: «Վարչակարգը շարունակում է լռեցնել մնացած մի քանի անկախ ձայներին, որոնց դեռ չի հաջողացրել ճնշել»,- ասվում է զեկույցում:

Վրաստանը բարելավել է դիրքերը 15 հորիզոնականով՝ նախորդ տարվա 84-րդ հորիզոնականի փոխարեն զբաղեցնելով 69-րդ հորիզոնականը:

«ԶԼՄ-ների ազատության» վարկանիշային ցուցակում երրորդ տարին անընդմեջ առաջատար դիրք է զբաղեցնում Ֆինլանդիան, որին հաջորդում են Նորվեգիան, Դանիան, Նիդերլանդները, Շվեդիան: Ռուսաստանը զբաղեցնում է 152-րդ, ԱՄՆ-ն՝ 49-րդ տեղը: Ցանկում վերջին տեղերն են զբաղեցնում Թուրքմենստանը, ԿԺԴՀ-ն և Էրիթրեան:

ԶԼՄ-ների ազատության մակարդակը ողջ աշխարհում անցած տարի «կտրուկ անկում» է գրանցել, ասված է «Լրագրողներ առանց սահմանների» միջազգային ոչ կառավարական կազմակերպության զեկույցում, հաղորդում է BBC-ի ռուսական ծառայությունը:

Ինչպես նշված է փաստաթղթում, նման իրավիճակը պայմանավորված է նաև ծայրահեղական խմբավորումների, այդ թվում՝ «Իսլամական պետության» և «Բոկո Հարամի» ակտիվացման հետ:

Զեկույցի տվյալներով՝ 180 երկրների երկու երրորդը, որտեղ անցկացվել է հետազոտությունը, ցույց են տվել ավելի վատ արդյունք, քան նախորդ մի քանի տարիներին:

Ինչպես France-Presse-ին տված հարցազրույցում նշել է «Լրագրողներ առանց սահմանների» կազմակերպության Փարիզի ներկայացուցչության մամուլի հարցերով ղեկավար Կրիստոֆ Դելուարը, ԶԼՄ-ների ազատության հետ կապված իրավիճակի վատթարացումը կապված է մասնավորապես տեղեկատվական պատերազմների և տարբեր ոչ կառավարական խմբերի կողմից մամուլի վրա գործադրվող ճնշումների հետ:

«Լրագրողներ առանց սահմանների» կազմակերպությունը հիմնվել է 1985թ. Փարիզում՝ համացանցում գրաքննության դեմ պայքարելու և մասնագիտական գործունեության պատճառով տուժած լրագրողներին աջակցելու նպատակով:

Հղումներ թեմայով.

Մամուլի ազատության սանդղակում Հայաստանը պահպանել է 78-րդ տեղը. «Լրագրողներ առանց սահմանների». Tert.am

Reporters Without Borders: World Press Freedom Index 2015: decline on all fronts