Պուտինի, Նազարբաևի ու Լուկաշենկոյի հանդիպումը տեղի կունենա մարտի 20-ին Աստանայում

16 մարտի 2015 - 12:22 AMT

PanARMENIAN.Net - Ղազախստանի, Ռուսաստանի և Բելառուսի նախագահներ Նուրսուլթան Նազարբաևը, Վլադիմիր Պուտինը և Ալեքսանդր Լուկաշենկոն կհանդիպեն մարտի 20-ին՝ Աստանայում, հայտնել է Ղազախստանի նախագահի մամուլի քարտուղար Դաուրեն Աբաևը:

Կրեմլի մամուլի ծառայությունում տեղեկությունը հաստատել են, հայտնում է Ինտերֆաքսը:

Ըստ Աբաևի, ակնկալվում է, որ նախագահները կքննարկեն փոխադարձ առևտրի խորացմանն ու տնտեսական գործակցությանն առնչվող հարցեր:

Բացի այդ, կքննարկվեն համաշխարհային տնտեսության միտումները, ինչպես նաև իրավիճակն Ուկրաինայում, ասել է Աբաևը:

Ավելի վաղ հայտնի դարձավ, որ մարտի 13-ին Աստանայում կայանալու է Բելառուսի, Ղազախստանի և Ռուսաստանի ղեկավարների եռակողմ հանդիպումը: Ինչպես ասվում է Ղազախստանի նախագահի պաշտոնական կայքում, նախագահները կքննարկեն փոխադարձ առևտրի ու տնտեսական գործակցությանն առնչվող հարցեր: Նախագահները կքննարկեն նաև միտումները համաշխարհային տնտեսության մեջ, ինչպես նաև իրավիճակն Ուկրաինայում:

Հայաստանը հանդիպմանը մասնակցելու հրավեր չի ստացել:

Հայաստանի փոխարտգործնախարար Շավարշ Քոչարյանը հայտարարեց, որ հայկական կողմը չի մասնակցի Եվրասիական տնտեսական միության երեք հիմնադիր անդամների՝ Ռուսաստանի, Բելառուսի և Ղազախստանի նախագահների՝ մարտի 12-ին և 13-ին Աստանայում կայանալիք հանդիպմանը, քանի որ որևէ տարաձայնություն չունի այդ երկրների հետ։

«Այդ երեք պետությունը փոխադարձ խնդիրներ ունեն, որոնք չեն թաքցնում, և իրենք փորձում են այդ՝ իրենց միջև եղած տարաձայնությունները հարթել: Մենք տարաձայնություն չունենք, մենք նոր ենք (ԵՏՄ) անդամ, մենք խնդիրներ չունենք այդ պետություններից որևէ մեկի հետ կապված Եվրասիական տնտեսական միության հետ կամ այլ», - պարզաբանել է փոխարտգործնախարարը, գրում է «Ազատություն» ռադիոկայանը:

Հայաստանը ԵՏՄ-ին անդամակցելու համաձայնագիրը կնքեց հոկտեմբերի 10-ին և ԵՏՄ լիիրավ անդամ դարձավ 2015-ի հունվարի 2-ին: Անդամակցության պայմանագրով նախատեսվում է 1-8 տարի Հայաստանի և ԵՏՄ մաքսային տոկոսադրույքների ներդաշնակեցման համար, 12-60 ամիս՝ Մաքսային միության տեխնիկական կանոնակարգերի ընդունման, 3 տարի՝ մտավոր սեփականության օբեյկտների իրավունքների պահպանության ու պաշտպանության հարցերի կարգավորման համար: Անցումային շրջանում ԵՏՄ-ն իրավունք ունի որոշելու Հայաստանի տարածք իր ապրանքների ներմուծման հատուկ կարգը: Պայմանագրով նախատեսվում են նաև ապրանքների տեղափոխման առանձնահատկությունները օտար պետությունների տարածքով: Հայաստանը կստանա ԵՏՄ մաքսային մուտքերի 1,13 տոկոսը:

ԵՏՄ կենտրոնակայանը լինելու է Մոսկվայում, ֆինանսական կանոնակարգողը՝ Ալմաթիում, իսկ ԵՏՄ դատարանը՝ Մինսկում: Բելառուսը նաև իրավունք է ստացել նախագահելու միությունում 2015 թ.:

Ընթացիկ տարում միությանը կարող է միանալ նաև Ղրղզստանը:

Հղումներ թեմայով.

Интерфакс: Путин встретится с Назарбаевым и Лукашенко 20 марта в Астане