20  17.03.15 - Եվրանեսթ ԽՎ-ի չորրորդ լիագումար նիստի պաշտոնական բացումը

Նախագահը՝ Եվրանեսթում. Ղարաբաղյան խնդիրը, ՀՀ-ԵՄ հարաբերություններն ու սահմանադրական բարեփոխումները

Նախագահը՝ Եվրանեսթում. Ղարաբաղյան խնդիրը, ՀՀ-ԵՄ հարաբերություններն ու սահմանադրական բարեփոխումները

PanARMENIAN.Net - ՀՀ Ազգային ժողովում այսօր տեղի ունեցավ Եվրամիության Արևելյան գործընկերության Եվրանեսթ խորհրդարանական վեհաժողովի չորրորդ լիագումար նիստի պաշտոնական բացումը: Նիստի բացմանը ներկա էր և ելույթ ունեցավ ՀՀ նախագահ Սերժ Սարգսյանը:

«Հայաստան-ԵՄ հարաբերությունները զարգանում են դիմանիկ կերպով: Վստահ եմ, որ Եվրանեսթի նստաշրջանի ծավալուն օրակարգում ընդգրկված կարևոր հարցերի շուրջ խորհրդարանական ձևաչափով ընթացող քննարկումները և որոշումները կնպաստեն Եվրոպական միության և գործընկեր երկրների միջև համագործակցության խորացմանը տարբեր բնագավառներում»,- այս մասին այսօր ՀՀ Ազգային ժողովում ընթացող Եվրանեսթ խորհրդարանական վեհաժողովի չորրորդ լիագումար նիստի պաշտոնական բացմանը ասել է ՀՀ նախագահ Սերժ Սարգսյանը:

«Ուրախ ենք Երևանում հյուրընկալել Եվրանեսթի նիստը, որից հետո մեկնելու եմ Բրյուսել՝ մասնակցելու ԵԺԿ գագաթաժողովին: Երևանում և Բրյուսելում նախատեսվում են իմ հանդիպումները ԵՄ բարձրաստիճան պաշտոնատար անձանց հետ, իսկ մի քանի օրից Երևանում տեղի կունենա նաև Հայաստան-Եվրոպական միություն խորհրդարանական համագործակցության հանձնաժողովի նիստը»,- նշել է նախագահը:

Սերժ Սարգսյանը վստահություն հայտնեց, որ միջխորհրդարանական քննարկումները թույլ կտան ճիշտ պատկերացում կազմել մեր ժողովուրդների առջև կանգնած մարտահրավերների մասին ու փորձել միասին գտնել դրանց հաղթահարման ուղիները:

«Ուրախալի է, որ համաեվրոպական արժեքային համակարգի տարածմանն ու արմատավորմանն ուղղված մեր համագործակցությունն ընդգրկում են թե խորհրդարանական, թե քաղաքացիական հասարակության շրջանակները: Հայաստանն այսօր ազատ խոսքի ու ազատ մամուլի երկիր է, մենք ունենք հավաքների ազատություն, կայացած քաղաքացիական հասարակություն, որը գիտի՝ ինչպես կարող է պայքարել ու իր տեսլականը կյանքի կոչելու համար մեծ դերակատարում ունենալ»,- նշել է Սերժ Սարգսյանը, հայտնում է Panorama.am:

Նա նշել է, որ Հայաստանում ժողովրդավարական գործընթացներն ավելի խորացնելու համար նախաձեռնել են սահմանադրական բարեփոխումներ՝ նպատակ ունենալով կատարելագործել մարդու հիմնական իրավունքների և ազատությունների երաշխավորման սահմանադրական կառուցակարգերը:

ՀՀ նախագահը նշել է նաև, որ Հայաստանը հանձնառու է զարգացնել համագործակցությունը ԵՄ-ի հետ:

Նախագահն իր խոսքում անդրադարձել է նաև ղարաբաղյան հակամարտությանը: «Մենք չենք պատրաստվում այս հարթակը վերածել քարոզչության կամ ժողովուրդների միջև թշնամանք սերմանելու միջոցի, ինչպես դա եղավ Ադրբեջանում, այլ փորձում ենք Վեհաժողովի ընձեռած հնարավորությունները լավագույնս ծառայեցնել մեր ժողովուրդների խաղաղ գոյակցության և համագործակցության ընդլայնման գործին»,- ՀՀ Ազգային ժողովում «Եվրանեսթ» խորհրդարանական վեհաժողովի չորրորդ լիագումար նիստի պաշտոնական բացման արարողության ժամանակ հայտարարել է ՀՀ նախագահ Սերժ Սարգսյանը:

Նրա խոսքերով՝ ասվածի վկայությունն է հայկական պատվիրակությունների ակտիվ մասնակցությունը Ադրբեջանում կայացած բազմաթիվ միջոցառումներին` ներառյալ 2012թ-ին Բաքվում կայացած Եվրանեսթի լիագումար նիստին:

«Ցավում եմ, որ ադրբեջանական կողմը ընդառաջ չի գնում մեր կառուցողական երկխոսության հաստատմանն ուղղված քայլերին: Առավել մտահոգիչ է, սակայն, որ մեր հարևան պետությունը ապակառուցողական և առավելապաշտական կեցվածք է դրսևորում Ղարաբաղյան հակամարտության կարգավորման բուն գործընթացում` հետ կանգնելով արդեն իսկ ձեռք բերված պայմանավորվածություններից»,- նշել է երկրի ղեկավարը:

Հանրապետության ղեկավարի խոսքերով՝ մի բան պարզ է, որ խնդրի լուծման բանալին գտնվում է Ստեփանակերտում, Երևանում ու Բաքվում և ոչ թե Վաշինգթոնում, Մոսկվայում ու Փարիզում:

«Ադրբեջանը մտացածին պատրվակներ է գտնում համանախագահողների առաջարկած սկզբունքների հիման վրա կարգավորումից խուսափելու նպատակով: Կարծում եմ՝ անհրաժեշտ է միջազգային կառույցների և եվրոպական կառույցների աներկբա գնահատականը այդ երկրի գործելաոճին: Անկախ Ադրբեջանի անիրատեսական պահանջներից և շփման գծում իրականացվող պարբերական սադրանքներից՝ ԼՂ հիմնահարցի խաղաղ կարգավորումը այլընտրանք չունի»,- ընդգծեց ՀՀ նախագահը:

Ըստ Սերժ Սարգսյանի՝ միջազգային հանրության մոտեցումը, հատկապես վերջին տարիներին այն է, որ եվրոպական ու համամարդկային արժեքների վրա հիմնված, ժողովուրդների ազատ կամաարտահայտությունն ու ինքնորոշման իրավունքը այլընտրանք չունեն:

«Լեռնային Ղարաբաղի ժողովրդի կողմից ևս այդ իրավունքի իրականացնումն է, որ կարող է հանգեցնել այդ հարցի համապարփակ լուծմանը: Այդ մոտեցումն է ընկած նաև ԵԱՀԿ ՄԽ համանախագահողների առաջարկությունների հիմքում»,- եզրափակել է Սերժ Սարգսյանը:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---