ԱՄՆ Սենատի արտաքին հարաբերությունների հանձնաժողովը սեպտեմբերի 7-ին վերսկսում է լսումները Հայաստանում դեսպանի պաշտոնում Ռիչարդ Հոգլանդին նշանակելու վերաբերյալ: Բացի այդ նիստի օրակարգում է ՄԱԿ-ում ԱՄՆ-ի ներկայացուցչի թեկնածությունների քննարկումը, ասվում է ԱՄՆ Սենատի կայքում զետեղված հաղորդագրության մեջ: Նշենք, որ Երեւանում ներկայիս ԱՄՆ դեսպան Ջոն Էվանսն ավարտեց իր դիվանագիտական առաքելությունը եւ սեպտեմբերի կեսին կմեկնի Հայաստանից: Հիշեցնենք, որ 2006 թվականի օգոստոսին հանձնաժողովի 18 անդամներից 9-ը դեմ են արտահայտվել դեսպան Ջոն Էվանսին ետ կանչելուն: Նրանք նաեւ գտնում են, որ Ռիչարդ Հոգլանդի թեկնածությունը հարմար չէ Հայաստանում դեսպանի պաշտոնի համար, քանի որ նա չի ճանաչում Հայոց ցեղասպանությունը: