ԱՊՀ երկրները կառավարությունների մակարդակով պայմանավորվել են վերացնել այն խոչընդոտները, որոնք խանգարում են միմյանց շուկաների հասանելիությանը, հայտարարել է ՌԴ վարչապետ Դմիտրի Մեդվեդևը: Մեդվեդևը հայտնել է, որ ԱՊՀ կառավարությունների ղեկավարների խորհրդի նիստում քննարկվել են մի շարք խնդիրներ, որոնց բախվում են երկրների տնտեսությունները անբարենպաստ արտաքին տնտեսական պայմաններում, ինչպես օրինակ, հումքային շուկաներում գների տատանման դեպքում:
Նա նաև կարևորեց համատեղ գործողությունների ծրագիրը ֆինանսատնտեսական ոլորտում, որը ներառում է տնտեսական աճին, ֆինանսական շուկաների զարգացմանը, փոխադարձ առևտրի ծավալների աճին նպաստող միջոցներ:
Մեդվեդևը նաև արձանագրեց, որ վերջին շրջանում «մի շարք պետությունների դեպքում նկատվում է ապրանքաշրջանառության նվազում, կապված հենց այդ պատճառների հետ», հայտնում է ՌԻԱ Նովոստի գործակալությունը:
«Մենք նաև մտահոգված ենք, պայմանավորվել ենք խորացնել առևտրային գործակցությունը, ինչպես նաև շարունակել աշխատանքն, ուղղված շուկաների փոխադարձ մատչելիության արգելքների վերացմանը: Այս բանավեճը ձևական չէր, հեշտ չէր, սակայն որոշակի հանգուցալուծումներ այդ ուղղությամբ հաջողվեց նախանշել»,-ասել է Մեդվեդևը:
