Հունիսի 10-ին Թուրքիայի Դիարբեքիր (պատմ. Տիգրանակերտ) քաղաքում մեկնարկում են հայազգի անվանի երաժիշտ, ուդի վարպետ Արամ Տիգրանի անվան արվեստի օրերը: Նման նախաձեռնություն` ի հիշատակ Արամ Տիգրանի, արդեն 4-րդ անգամ է կյանքի կոչվում Դիարբեքիրում:

Արամ Տիգրանի պապերը Հայոց ցեղասպանության տարիներին Դիարբեքիրից արտագաղթել են Սիրիա և վերաբնակվել Ալ-Քամիշլի քաղաքում: Անվանի երաժիշտը երգել է հայերեն, քրդերեն, արաբերեն, ասորերեն և հունարեն:

Թուրքիայուն հրատարակվող հայկական «Ակօս» թերթի տեղեկացմամբ` Արամ Տիգրանի անվան Դիարբեքիրի քաղաքային կոնսերվատորիայի կողմից իրականացվող միջոցառումների շրջանակներում կկազմակերպվեն համերգներ, ֆիլմերի ցուցադրություններ ու կբեմադրվեն ներկայացումներ: Այս տարվա միջոցառումների հատուկ հյուրը ծնունդով դերսիմցի երաժիշտ Միքաիլ Ասլանն է:Արվեստի օրերը կշարունակվեն մինչև հունիսի 13-ը ներառյալ, գրում է Ermenihaber-ը:

Ժամանակակից հայազգի երգիչ և երաժիշտ Արամ Տիգրանը (Արամ Մելիքյան 1934 – 2009) ծնվել է հյուսիսային Սիրիայի Ալ-Քամիշլի բնակավայրում։ Ընտանիքը Քամիշլի է գաղթել Ցեղասպանության ժամանակ Արևմտյան Հայաստանի Դիարբեքիր քաղաքից: Մասնագիտացել է ուդ նվագելու մեջ։ Քսան տարեկանից իրեն նվիրել է երաժշտությանը:

Արամ Տիգրանը եղել է «Քուրդստանի բանվորական կուսակցության» ցմահ առաջնորդ, այժմ՝ Թուրքիայի Իմրալը կղզում ցմահ բանտարկված Աբդուլլահ Օջալանի ամենամտերիմ և վստահելի մարդկանցից մեկը:

Մահացել է Աթենքում 2009թ. օգոստոսի 8-ին: Ցանկանում էր թաղվել Դիարբեքիրում: Սակայն երգչի ցանկությունը չկատարվեց, քանի որ թուրքական իշխանությունները թույլ չտվեցին հայազգի երաժիշտին թաղել Դիարբեքիրի հայկական գերեզմանատանը։ Այնուամենայնիվ, Դիարբեքիրի հայկական գերեզմանոցում կատարվեց Արամ Տիգրանի խորհրդանշական հուղարկավորությունը, իսկ արդեն նրա համար փորված գերեզմանի հողը Դիարբեքիրի քաղաքապետ Օսման Բայդեմիրն իր հետ տեղափոխել է Բրյուսել, որտեղ թաղվել է հայտնի հայազգի երաժիշտը: