ԶԼՄ-ներ. «Իսլամական պետության» գրոհայիններն ականապատում են սիրիական Պալմիրան

22 հունիսի 2015 - 12:23 AMT

PanARMENIAN.Net - «Իսլամական պետություն» ահաբեկչական խմբավորման գրոհայիններն ականապատում են ՅՈւՆԵՍԿՕ-ի համաշխարհային ժառանգության ցանկում ընդգրկված հինավուրց Պալմիրայի ավերակները, հայտնում է Reuters գործակալությունը` Լոնդոնում Մարդու իրավունքների պաշտպանության դիտարկման սիրիական կենտրոնի վրա հղումով:

Ըստ Աստվածաշնչի Պալմիրան հիմնել է Սողոմոն արքան Դամասկոսի և Եփրատի միջև գտնվող օազիսում: 3 կմ տարածք զբաղեցնող Պալմիրայի ավերակները, թվագրված III դարով, ընդգրկված են ՅՈւՆԵՍԿՕ-ի համաշխարհային ժառանգության ցուցակում: Մինչ պատերազմը այստեղ ապրում էր 35 հազար մարդ, 2013-ին ծայրահեղականների առաջին հարձակումից հետո մոտ 9 հազարը հեռացան քաղաքից:

Ըստ այդ տեղեկությունների, ծայրահեղականները տարբեր պայթուցիկներ են տեղադրում Պալմիրայում, սակայն դեռ հայտնի չէ` արդյոք գրոհայինները մտադիր են պայթեցնել մշակութային հուշարձանները, թե նրանց թիրախը կառավարական զորքերն են, որոնք մայիսի կեսից փորձում են հետ գրավել բնակավայրը, հայտնում է ՏԱՍՍ գործակալությունը:

Սուննիների ծայրահեղական «Իսլամական պետություն» կազմակերպության «սև դրոշները» մայիսի 21-ին հայտնվեցին անտիկ Պալմիրայի ավերակների վրա:

Ավելի վաղ ԻՊ գրոհայինները հայտարարություն տարածեցին, որ «Իսլամական պետությունը» խոստանում է «զուսպ» լինել հելլենական մշակույթի ամենաարժեքավոր հուշարձաններից մեկի`Սիրիայի տարածքում գտնվող Պալմիրայի ավերակների հարցում:

Ըստ տեղաբնակների, ահաբեկիչները հայտարարել էին, թե չեն դիպչի ավերակներին: «Նրանք խոստացել են, որ միայն անտիկ հուշարձանները կքանդեն, որոնք, ըստ իսլամի, հեթանոսական կուռքեր են»,-ասել են տեղի համակարգող կոմիտեի ակտիվիստները:

Նրանք նշում են, որ գրոհայինները դեռ չեն սկսել ջարդել արձանները: Տեղաբնակները կարծում են, որ պատերն ու սյուները այնքան չեն վանում իսլամիստներին, որքան հեթանոսական արձանները: Ցավոք, Միջագետքի հողին հավասարեցված քաղաքներն այլ բան են վկայում: Մինչդեռ, «Իսլամական պետության» գրոհայիններն արդեն իրենց կարիքների համար են օգտագործում Պալմիրայի ամենահայտնի պատմական օբյեկտը: Շարժման 20 հակառակորդներ գնդակահարվեցին հռոմեական թատրոնի բեմում: Տեղաբնակներին հավաքել էին դիտելու այդ արյունալի գործողությունը:

2014-ի ամռան սկզբին «Իսլամական պետության» զինյալները գրավեցին մի շարք բնակավայրեր Սիրիայի արևելքում և սկսեցին առաջանալ դեպի Իրաքի սահմանները: Ծայրահեղականները հաջողության են հասել նաև իրաքյան տարածքներում՝ վերահսկողություն սահմանելով երկրի արևմուտքում մի քանի քաղաքների վրա: Գրոհայինները զանգվածային մահապատիժներ են իրականացնում Իրաքի բանակի զինծառայողների ու բնակիչների շրջանում գրավյալ տարածքներում: Հայտնի է առնվազն մի քանի հարյուր սպանվածների մասին: Մարտական գործողություններն ուղեկցվում են զանգվածային բնաջնջմամբ: Ըստ արևմտյան երկրների ԶԼՄ-ների, հակամարտության գոտում արդեն մոտ 10 հազար քրիստոնյա ու եզդի է սպանվել:

ԻՊ ահաբեկչական խմբավորումը «խալիֆատ» հռչակեց Սիրիայի ու Իրաքի գրավյալ տարածքներում 2014-ի ամռանը: ԱՄՆ-ն մի շարք դաշնակից երկրների հետ սեպտեմբերի 23-ին ավիահարվածներ սկսեց հասցնել ԻՊ դիրքերին Սիրիայում, իսկ Իրաքում նման գործողություններն արդեն օգոստոսից էին սկսվել: Ընդ որում ԱՄՆ ավիահարվածներ է հասցնում առանց Սիրիայի իշխանությունների համաձայնության: Վաշինգտոնը սատարում է Սիրիայի զինված ընդդիմությանը, որը կռվում է ինչպես կառավարության, այնպես էլ ԻՊ գրոհայինների դեմ:

Հղումներ թեմայով.

BBC. Islamic State crisis: 'Mines planted in Syria's Palmyra'

Tass.ru. СМИ: боевики "Исламского государства" минируют древний город Пальмиру в Сирии