Զախարյան․ Քննարկվում է հոսանքի գնի բարձրացված մասին սուբսիդավորման աղբյուր գտնելու հարցը

PanARMENIAN.Net - Էլեկտրական էներգիայի սակագնի բարձրացված մասը՝ 6,93 դրամը, կսուբսիդավորի պետությունը, սակայն դա կիրականացվի ոչ պետական բյուջեի հաշվին, ու այժմ քննարկվում է, թե ինչ աղբյուրներից պետք է հայթայթվեն այդ միջոցները։ Այդ մասին լրագրողների հետ ճեպազրույցումտեղեկացրեց ՀՀ էներգետիկայի և բնական պաշարների նախարար Երվանդ Զախարյանը:

«Սուբսիդավորումը կիրականացվի աուդիտի անցկացման ամբողջ ընթացքում, բոլոր խավերի համար՝ անկախ նրանից, թե որքան այն կտևի՝ 3 ամիս, 4, թե 6՝ կախված է աշխատանքի ծավալներից։ Աուդիտի անցկացման մանրամասները և այն, թե ով է անցկացնելու, հայտնի կլինեն մոտ օրերին։ Այն կտա բոլոր հարցերի պատասխանները, այդ թվում՝ սակագնի ձևավորման հիմնավորվածության հետ կապված»,- շեշտեց Զախարյանը։

Հունիսի 27-ին նախագահ Սերժ Սարգսյանը հայտարարել էր, որ ՀԷՑ-ում աուդիտ կանցկացվի ու մինչև դրա եզրակացության կազմումը Կառավարությունն իր վրա կվերցնի էլեկտրաէներգիայի սակագնի բարձրացման ամբողջ բեռը:

Դիտարկմանը, թե մասնագետները պնդում են, որ աուդիտը չի հայտնաբերի չարաշահումները, վարչապետ Հովիկ Աբրահամյանն ավելի վաղ ի պատասխան միայն ժպտացել է՝ նշելով, որ հուլիս ամսվա մեջ հայտնի կլինի, թե որ կազմակերպությունը կանցկացնի աուդիտը:

Նախարարը նշեց, որ էներգետիկ համակարգում իրոք կան բազում խնդիրներ, որոնց բազմիցս անդրադարձել են։ Դրանով է պայմանավորված, որ մի շարք հարցերի լուծման շուրջ արդեն ծրագրեր են նախապատրաստվում։

«Այսօր արդեն պատրաստ են համակարգի զարգացման հիմնադրույթները, մինչև 2036 թվականի ռազմավարության ծրագիրը։ Այն երկու անգամ քննարկվել է ՀՀ վարչապետի մասնակցությամբ, Հանրային խորհրդում և նախատեսում ենք քննարկել Ազգային ժողովում, ինչից հետո ՀՀ կառավարությունը կհաստատի այն։ Փաստաթուղը կդառնա մեզ համար աշխատանքային ծրագիր։ Նպատակը մեկն է՝ ապահովել կայուն ու կանխատեսելի էներգետիկ համակարգ ազգաբնակչության համար»,- ավելացրեց Զախարյանը։

Հունիսի 30-ին «Տնտեսական օրակարգ 2015» համաժողովի ընթացքում իր ելույթում Հովիկ Աբրահամյանը հայտարարել էր, թե Համաշխարհային բանկի և ԱՄՆ Միջազգային Զարգացման գործակալության հետ կառավարությունը պատրաստել է 2016-2036 թթ. էներգետիկ համակարգի ռազմավարական զարգացման ծրագիրը, որը շուտով կդրվի լայն մասնագիտական և հանրային քննարկման:

«Սա մեր կարևորագույն խնդիրներից է, և մենք ամեն ինչ պետք է անենք այս ոլորտը ֆինանսապես առողջացնելու և դրա համար հանրության աջակցությունն ունենալու համար: Մենք աննախադեպ քայլեր ենք իրականացնում բաց տեղեկատվության և լավագույն միջազգային փորձագետների ընդգրկմամբ հասարակությունում առկա անվստահության անջրպետը վերացնելու ուղղությամբ: Սակայն մենք հակված չենք հանրության ընդգրկումը միայն կարճաժամկետ հատվածում նայել», - ասել էր վարչապետը:

Ըստ Աբրահամյանի՝ ինչպես ցույց տվեցին վերջին զարգացումները, խիստ կարևոր է պետության քաղաքականության, պետական ինստիտուտների նկատմամբ հանրային վստահությունը, և նա չգիտի հանրային վստահության հասնելու առավել լավ մեթոդ, քան երկխոսությունն է:

Հունիսի 17-ի նիստում ՀԾԿՀ-ն մասնակի բավարարել էր էլէներգիայի սակագնի բարձրացման վերաբերյալ «Հայաստանի էլեկտրական ցանցեր» ընկերության հայտը՝ սակագինն օգոստոսի 1-ից կբարձրանա ոչ թե 17, այլ 6,93 դրամով:«Ոչ թալանին» քաղնախաձեռնության անդամները հունիսի 19-ից նստացույց են սկսել Երևանի կենտրոնում Էլեկտրաէներգիայի սակագնի բարձրացման դեմ: