Թուրքիայի նախագահը կհանձնարարի կառավարություն կազմել. Վարչապետն արտահերթ ընտրությունները չի բացառում

PanARMENIAN.Net - Թուրքիայի վարչապետ Ահմեթ Դավութօղլուն չի բացառել երկրում արտահերթ խորհրդարանական ընտրությունների անցկացումը:

«Միլլիյեթ» թուրքական պարբերականի կայքին հղումով Tert.am-ը գրում է, որԴավութօղլուի խոսքով՝ ինքն սկսելու է բանակցել բոլոր կուսակցությունների հետ, որոնք իրավունք են ձեռք բերել ներկայացված լինելու երկրի խորհրդարանում, սակայն եթե կոալիցիոն կառավարության ստեղծման վերաբերյալ համաձայնություն ձեռք չբերվի, արտահերթ խորհրդարանական ընտրություն տեղի կունենա:

ՄիաժամանակԹուրքիայի փոխվարչապետ Նուման Քուրթուլմուշն ասել է, որ նախագահ Էրդողանն այս շաբաթվա մեջ կհանձնարարի նոր կառավարություն ձևավորել:

«Ընտրություններից հետո Թուրքիայում ամեն ինչ ընթանում է ըստ սահմանված իրավական կարգի: Նախ երդման արարողությունն արվեց, այնուհետև` խորհրդարանի նախագահ ընտրվեց: Այնուհետև հերթը կառավարությանն է: Ամենայն հավանականությամբ, մեր նախագահն այս շաբաթ կհանձնարարի նոր կառավարություն ձևավորել»,- ասել է Քուրթուլմուշը, մեջբերում է Ermenihaber.am-ը:

Հունիսի 7-ին Թուրքիայում խորհրդարանական ընտրություններ էին տեղի ունեցել, որին մասնակցել է 20 կուսակցություն: Ընտրությանը մասնակցել է 53 մլն ընտրող:Ընտրության արդյունքների հրապարակումից հետո 45 օրվա ընթացքում երկրում պետք է կառավարություն ձևավորվի: Սակայն իշխող «Արդարություն և զարգացում» կուսակցությունը բացարձակ մեծամասնություն կազմել չի կարողացել և ստիպված է կոալիցիոն կառավարություն ձևավորել։