13  20.07.15 - ՀՀ նախագահ Սերժ Սարգսյանի և Եվրոպական խորհրդի նախագահ Դոնալդ Տուսկի համատեղ մամուլի ասուլիսը

ԵՄ խորհրդի նախագահը՝ ՀՀ հետ գործակցության, առանց վիզայի ռեժիմի ու ԼՂ խնդրի կարգավորման մասին

ԵՄ խորհրդի նախագահը՝ ՀՀ հետ գործակցության, առանց վիզայի ռեժիմի ու ԼՂ խնդրի կարգավորման մասին

PanARMENIAN.Net - Եվրամիությունը ցանկանում է ամրապնդել գործակցությունը Հայաստանի հետ փոխադարձ հետաքրքրություն ներկայացնող բոլոր ոլորտներում: Այս մասին հուլիսի 20-ին հայտարարել է Եվրամիության խորհրդի նախագահ Դոնալդ Տուսկը ՀՀ նախագահ Սերժ Սարգսյանի հետ հանդիպմանը հաջորդած համատեղ ասուլիսի ժամանակ:

«Մենք պատրաստ ենք գործակցել Հայաստանի հետ և հարգում ենք ՀՀ ընտրությունը՝ լինել Եվրասիական տնտեսական միության անդամ»,- ընդգծել է Տուսկը, հաղորդում է «Ազատություն» ռադիոկայանը:

Նրա խոսքով՝ ԵՄ-ն նախկինի պես պատրաստակամ է խորացնել Հայաստանի հետ հարաբերությունները՝ աշխատելով միասին շուկաները բացելու ուղղությամբ, առաջ ընթանալով ժողորդավարական բարեփոխումների օրակարգով, տնտեսական աճով, տարածաշրջանային ինտեգրման ճանապարհով, գործարար ներդրումների միջավայրի բարելավման ուղղությամբ, կայուն զարգացման ճանապարհով:

«Հայաստանը կարող է հույս կապել ԵՄ օժանդակության շարունակման հետ, որպեսզի առաջ ընթանա սոցիալական, քաղաքական բարեփոխումների ուղղությամբ, շարունակի պահպանել, պաշտպանել մարդու իրավունքներն ու հիմնարար ազատությունները», - հավելել է Տուսկը, մեջբերում է Panorama.am-ը:

Նա նաև նշել է, որ բարեհաջող ավարտել են ՀՀ-ԵՄ երկկողմ հարաբերությունների նոր համապարփակ համաձայնագրի բանակցությունների առաջին փուլը: Ըստ Տուսկի՝ այս համաձայնագրով նախանշել են ապագա գործակցության ոլորտները, ԵՄ անդամ պետություններն արդեն իսկ քննարկում են այս բանակցությունների մանդատի տրամադրման հարցը:

«Ողջունում եմ այն դրական առաջընթացը, որը Հայաստանը ձեռք է բերել շարժունակության գործընկերության, վիզաների դյուրացման և ռեադմիսիայի համաձայնագրերի արդյունավետ կատարման ուղղությամբ, որոնք ուժի մեջ մտան 2014-ի հունվարից: Արդյունավետ իրագործումը կարևորագույն պայման է, որպեսզի սկսվեն վիզաների ազատականացման երկխոսության բանակցությունները: Առանց վիզաների ռեժիմը վերջնական նպատակն է: Լիահույս եմ, որ հաջորդ քայլը հնարավոր կլինի իրականացնել մոտակա ամիսներին, եթե աշխատանքի այս տեմպը պահպանվի», - ասել է Եվրամիության խորհրդի նախագահը:

2014-ին Հայաստանի և ԵՄ միջև ստորագրվեց «Վիզաների տրամադրման դյուրացման մասին» համաձայնագիրը: Դյուրացված կարգով Շենգենյան վիզա կարող են ստանալ պետական պաշտոնական պատվիրակությունների ներկայացուցիչները, ուսանողները, ԵՄ երկրներում մերձավոր բարեկամներ ունեցողները, կրթական, մշակութային, ակադեմիական, բուժման, գիտական նպատակով ԵՄ այցելողները, լրագրողները, միջազգային սպորտային միջոցառումների մասնակիցներն և այլոք:

Հայաստանում Շենգենյան գործակցության անդամ երկրների բոլոր հյուպատոսարանները հունիսի 23-ից միացել են Վիզաների տեղեկատվական համակարգին (ՎՏՀ)։ Նոր համակարգով Շենգենյան վիզայի համար դիմողներից կպահանջվի տրամադրել իրենց կենսաչափական տվյալները` մատնահետքեր և թվային լուսանկար, որոնք Շենգենյան վիզայի դիմումում նշված տեղեկատվության հետ կգրանցվեն ՎՏՀ տվյալների կենտրոնացման շտեմարանում: Համակարգին միանալով վիզա ստանալու ամբողջ գործընթացը կդյուրացվի:

ՀՀ նախագահը վստահություն է հայտնել, որ Եվրամիության հետ հարաբերությունների սերտացումը, Հայաստանում ժողովրդավարական գործընթացների և բարեփոխումների հետագա խորացումը կրելու է շարունակական բնույթ:

«Մենք արձանագրեցինք, որ Հայաստան-Եվրոպական միություն հարաբերությունները զարգանում են դինամիկ կերպով: Դա վկայում է, որ առկա են երկուստեք քաղաքական կամք և հանձնառություն և, որ ամենակարևորն է՝ ընդհանուր արժեհամակարգ, որի վրա կառուցում ենք զարգացման մեր ուղին»,- ասել է Սարգսյանը:

Բանակցությունների ժամանակ զրուցակիցներն անդրադարձել են ՀՀ-ԵՄ հարաբերություններին և ընթացիկ գործակցությանը, ԼՂ հիմնախնդրի կարգավորման բանակցային գործընթացին:

Մինև այդ, երկկողմ հանդիպմանը Տուսկը ՀՀ նախագահին խնդրել է ներկայացնել սահմանադրական բարեփոխումների իրականացման նպատակը և այդ գործընթացի վերաբերյալ նրա գնահատականը: Անդրադարձ է եղել նաև տարածաշրջանային խնդիրներին: Հանրապետության նախագահը ողջունել է Իրանի միջուկային ծրագրի շուրջ ձեռք բերված համաձայնությունը:

Խոսելով դժվարին բանակցությունների արդյունքում Հունաստանի ճգնաժամի հաղթահարման գործընթացում արձանագրված որոշակի առաջընթացի մասին՝ Սարգսյանը հույս է հայտնել, որ հարցը հնարավորինս արագ և կողմերի համար ընդունելի տարբերակով լուծման կհանգի: Նա նաև ընդգծել է, որ Հայաստանը շահագրգռված է ինչպես երկրի կարևորագույն գործընկեր ԵՄ տարածքում կայունության ապահովմամբ, այնպես էլ Հայաստանի դարավոր բարեկամ Հունաստանի բնականոն զարգացմամբ։

Հայաստան - Եվրամիություն գործակցության հեռանկարները Եվրամիության խորհրդի նախագահը քննարկել է նաև ՀՀ վարչապետ Հովիկ Աբրահամյանի հետ:

Վարչապետը բարձր է գնահատել Հայաստանի և Եվրոպական միության միջև գործակցության ընթացքը և նշել, որ երկուստեք քաղաքական կամք կա և հանձնառություն՝ էլ ավելի խորացնելու և ամրապնդելու փոխգործակցությունը:

«Եվրոպական միությունը եղել և շարունակում է մնալ Հայաստանի կարևոր գործընկերներից մեկը, որի հետ մեր գործակցությունը հիմնվում է առաջին հերթին ընդհանուր արժեքային համակարգի վրա: Հայաստանը պատրաստակամ է առաջ մղելու ԵՄ հետ փոխգործակցությունը բարեփոխումների խթանման, շարժունակության, արդյունավետ կառավարման, ժողովրդավարության, մարդու իրավունքների, տնտեսական գործակցության և երկուստեք հետաքրքրություն ներկայացնող այլ ոլորտներում»,- ասել է կառավարության ղեկավարը:

Տուսկն իր հերթին ընդգծել է, որ Հայաստանը կարևոր գործընկեր է Եվրոպական միության համար այս տարածաշրջանում, և Ռիգայում կայացած Արևելյան գործընկերության գագաթնաժողովից հետո ԵՄ-ն պատրաստակամ է նոր թափով շարունակել գործակցությունը:

«Արևելյան գործընկերություն» նախագիծը չի նախատեսում ԵՄ-ին անդամակցելու հնարավորութուն, այլ ուղղված է Եվրամիության քաղաքական և տնտեսական ինտեգրմանը Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի հետ: Վերջին երեքը ստորագրել են ԵՄ հետ ասոցացման համաձայնագիրը, որն արդեն վավերացվել է ԵՄ անդամների մեծամասնության կողմից: Մինչդեռ միաժամանակ Հայաստանն ու Բելառուսը ԵՏՄ անդամ պետություններ են, որին անդամակցում է նաև Ռուսատանը:

«Մենք նաև ձեր կողքին ենք բարեփոխումների ձեր օրակարգում, որը հավակնոտ է, և համոզված եմ, որ Ձեր անձնական հանձնառությամբ այն կյանքի կկոչվի», - նշել է Եվրոպական խորհրդի նախագահը:

Վարչապետը և ԵԽ նախագահը համոզմունք են հայտնել, որ ՀՀ-ԵՄ նոր շրջանակային համաձայնագիրը հնարավորություն կընձեռի նոր թափ հաղորդել երկկողմ հարաբերություններին և կնպաստի բազմաոլորտ գործակցության զարգացմանը:

Մայիսի 7-ին Հայաստանի և Ամերիկայի Միացյալ Նահանգների կառավարութունների միջև կկնքվել է առևտրի և ներդրումների մասին շրջանակային համաձայնագիր: Դրա շուրջ բանակցությունները շատ երկար են տևել: Այն ԱՄՆ կողմից այլ երկրների հետ կնքված տիպային փաստաթուղթ է: Փաստաթղթով նախատեսվում է ստեղծել Առևտրի և ներդրումների հայ-ամերիկյան խորհուրդ, որը կնախագահեն հայկական կողմից ՀՀ էկոնոմիկայի նախարարությունը, ամերիկյան կողմից՝ ԱՄՆ Առևտրի ներկայացուցչի գրասենյակը:

Անդրադառնալով Լեռնային Ղարաբաղի հակամարտության կարգավորմանը՝ Աբրահամյանը կարևորել է ԵՄ շարունակական աջակցությունը ԵԱՀԿ Մինսկի խմբի շրջանակում հակամարտության բացառապես խաղաղ հանգուցալուծմանը։ Իր հերթին Տուսկն ընդգծել է, որ ԼՂ հակամարտության խաղաղ կարգավորումն այլընտրանք չունի, և Եվրոպական միությունը շարունակելու է ջանքեր գործադրել այդ ուղղությամբ: Կողմերը մտքեր են փոխանակել նաև Հայաստանում սահմանադրական բարեփոխումների իրականացման հարցի շուրջ:

Հայաստանի Հանրապետության և Եվրոպական միության հարաբերությունները կարգավորվում են 1996-ին ՀՀ և եվրոպական համայնքների ու դրանց անդամ պետությունների միջև կնքված Գործընկերության և համագործակցության մասին համաձայնագրով: ԳՀՀ-ն համարվում է ներկայիս միակ իրավական հիմքը ՀՀ և ԵՄ հարաբերություններում: Դրա համակողմանի իրագործումը պայմանավորված է փոխադարձ շահերով և նպաստում է ՀՀ-ում քաղաքական, տնտեսական և իրավական բարեփոխումների գործընթացին: ԳՀՀ-ն ընդգրկում է համագործակցության բոլոր ոլորտները` բացի ՀՀ անվտանգության երաշխիքների տրամադրումից: Այն կարգավորում է տնտեսական, դատաիրավական, գիտատեխնիկական, կրթական, սոցիալական, շրջակա միջավայրի, տրասպորտի, ֆինանսական ծառայությունների, մաքսային ծառայությունների, զբոսաշրջիկության, ժողովրդավարության և մարդու իրավունքների ոլորտներում համագործակցությունը:

 Ուշագրավ
Նա նշել է, որ այժմ միայն ինստիտուցիոնալ բարեփոխումներ և բովանդակային աշխատանք պետք է արվի
Նա նշել է, որ երկրների միջև ռազմատեխնիկական համագործակցությունը երկար ավանդույթ ունի
Նա չկար ՀՀ վերադարձած հայ գերիների թվում, թեև ավելի վաղ Ադրբեջանում հրապարակած ցուցակում նրա անունն ընդգրկված էր
Փաշինյանի հեռախոսազրույցը Ղազախստանի նախագահ Կասիմ-Ժոմարտ Տոկաևի հետ
---