Չեչնիայի ղեկավար Ռամզան Կադիրովն առաջարկել է զրկել քաղաքացիությունից այն ռուսաստանցիներին, որոնք մեկնել են Սիրիա կամ Իրաք «Իսլամական պետության» շարքերը համալրելու նպատակով: «ՎԿոնտակտե» սոցցանցի իր էջում Չեչնիայի ղեկավարը հայտարարել է, որ թույլ չի տա հետ վերադառնալ հանրապետության այն բնակիչներին, որոնք մեկնել են միանալու իսլամիստներին: Նա կարծում է նաև, որ ՌԴ մյուս տարածաշրջանները ևս պետք է արգելեն մուտքն այն քաղաքացիներին, որոնք անդամակցում են ահաբեկչական կազմակերպություններին:
«Նրանց նպատակն է որքան հնարավոր է շատ մահմեդականների արյուն հեղել, խարխլել տնտեսությունը, փլուզել իսլամական երկրների ամբողջականությունը»,-գրել է Կադիրովը ջիհադիստական խմբավորման մասին, հայտնում է BBC-ի ռուսական ծառայությունը:
2014-ի ամռան սկզբին «Իսլամական պետության» զինյալները գրավեցին մի շարք բնակավայրեր Սիրիայի արևելքում և սկսեցին առաջանալ դեպի Իրաքի սահմանները: Ծայրահեղականները հաջողության են հասել նաև իրաքյան տարածքներում՝ վերահսկողություն սահմանելով երկրի արևմուտքում մի քանի քաղաքների վրա: Հուլիսի վերջում նրանք հայտարարեցին Իրաքի ու Սիրիայի տարածքում խալիֆայության ստեղծման մասին:
Զինված հակամարտությունն Իրաքի հյուսիսում սկսվեց «Իսլամական կազմակերպության» գրոհից հետ Մոսուլի ուղղությամբ, որն ահաբեկիչները գրավեցին հունիսի լույս 10-ի գիշերը: Ըստ որոշ գնահատականների, 1300 զինյալներ գրավեցին Նայնավա գավառի կառավարական հաստատությունները, բանակային օբյեկտները և Մոսուլի միջազգային օդանավակայանը: Մոտ 500 հազար բնակիչներ փախան քաղաքից: Գրոհայինները զանգվածային մահապատիժներ են իրականացնում Իրաքի բանակի զինծառայողների ու բնակիչների շրջանում գրավյալ տարածքներում: Հայտնի է առնվազն մի քանի հարյուր սպանվածների մասին: Մարտական գործողություններն ուղեկցվում են զանգվածային բնաջնջմամբ: Ըստ արևմտյան երկրների ԶԼՄ-ների, հակամարտության գոտում արդեն մոտ 10 հազար քրիստոնյա ու եզդի է սպանվել:
Իսլամիստների դեմ միջազգային կոալիցիան գլխավորող ԱՄՆ-ն ռմբակոծում է Իրաքի տարածքում գտնվող ԻՊ դիրքերը օգոստոսի կեսից, իսկ առաջին հարվածները Սիրիայի տարածքին հասցվեցին սեպտեմբերի 23-ին: Սեպտեմբերի 26-ին Պենտագոնը հանդես եկավ Իրաքում ու Սիրիայում ցամաքային գործողություն սկսելու օգտին:
