Ադրբեջանցի դիպուկահարի կրակոցից Արցախում զինվոր է զոհվել

PanARMENIAN.Net - Օգոտոսի 12-ին` ժամը 12:30-ի սահմաններում, ՊԲ արևելյան ուղղությամբ տեղակայված զորամասերից մեկի պահպանության տեղամասի մարտական հենակետում, հակառակորդի արձակած գնդակից մահացու հրազենային վիրավորում է ստացել զինծառայող Կարեն Պարույրի Հովհաննիսյանը: Դեպքի մանրամասները պարզելու համար կատարվում է քննություն:

Ըստ ՊՆ մամուլի խոսնակ Արծրուն Հովհաննիսյանի ֆեյսբուքյան գրառման, զինծառայողը զոհվել է ադրբեջանցի դիպուկահարի կրակոցից:

Քննչական կոմիտեն դեպքի առթիվ քրգործ է հարուցել: Նշվում է, որ ձեռնարկվում են անհրաժեշտ քննչական և դատավարական գործողություններ՝ զինծառայողի մահվան հանգամանքների բազմակողմանի և օբյեկտիվ հետազոտումն ապահովելու ուղղությամբ:

ՀՀ պաշտպանության նախարարությունն առավոտյան հայտարարություն էր տարածել, որում տեղեկացրել էր Բաքվում անցկացված Եվրոպական խաղերից հետո իրավիճակը սրելու Ադրբեջանի փորձերի մասին ու նշել, որ օգոստոսի լույս 12-ի գիշերը հակառակորդը դիվերսիոն հարձակման 2 փորձ է ձեռնարկել, որոնք ձախողվել են։

Օգոստոի 11-ին և լույս 12-ի գիշերը ղարաբաղա-ադրբեջանական հակամարտ զորքերի շփման գծի ամբողջ երկարությամբ հակառակորդը շարունակել է տարբեր տրամաչափի հրաձգային և հրետանային զինատեսակներից ինտենսիվորեն խախտել հրադադարի պահպանման ռեժիմը: Բացի խոշոր տրամաչափի հրաձգային զենքերից, ադրբեջանական զինուժը հայ դիրքապահների ուղղությամբ 60 և 82 մմ-անոց ականանետերից արձակել է 154 արկ: Ընդհանուր առմամբ նշված ժամանակահատվածում հակառակորդը հրադադարի պահպանման ռեժիմը խախտել է ավելի քան 170 անգամ` հայ դիրքապահների ուղղությամբ արձակելով մոտ 2600 կրակոց:

ՊԲ առաջապահ ստորաբաժանումները պատասխան գործողություններով ճնշել են հակառակորդի ակտիվությունը: